(CiberCuba) – E proceso di rindimento di cuenta di e delegadonan na nan electornan di base a cuminsa diabierna na Cuba y ta bay extende te cu dia 20 di november memey di un crisis grave di energia y alimento cu ta intensifica e malestar di e cuidadanonan.
Suspendi aña pasa pa motibo di escasez di combustibel cu e regimen a alega, e ehercicio di rindimento di cuenta cu a cuminsa ta pone den alerta e autoridadnan dilanti posibel manifestacionnan cu por tuma luga a causa di loke e regimen ta defini como “sistema democratico Cubano.”
“E rindimento di cuenta di delegadonan ta e proceso politico mas importante di e aña aki, pa cual, for di e Conseho di Estado, a realisa un convocatoria. E delegadonan, e consehonan popular, e asambleanan nacional y municipal cu tur su comisionnan, y e departamentonan di atencion na e instancianan aki den e provincianan, a traha intensamente,” Roberto Morales Ojeda, diputado pa e minicipio Cienfuegos, a sigura diabierna.
Segun Granma, a pesar di e circumstancianan di e contexto dificil den cual ta tuma luga e proceso aki, e diputado Morales Ojeda a defende e importancia di e intercambio democratico popular, for di cual mester sali solucionnan, “pasobra e sabiduria di e pueblo ta incalculabel.” Di mesun manera el a haci un yamada pa visualisa e proceso mediante e rednan social personal di e electornan.
Cu e pais pasando den loke por wordo considera e pio crisis di su historia den tur sector, e autoridadnan di e regimen tin miedo cu ta produci debatenan autentico den e hurisdiccionnan y cu e animonan di e electronan bira mas intenso, motibo door di cual nan a ratifica cu e proceso di rindimento di cuenta ta un instrumento clave pa e democracia socialista y revolucionario.
Na maart 2017, e presidente di e Asamblea Nacional di Poder Popular e tempo ey, Esteban Lazo Hernandez, tabata subraya cu e reunionnan pa rindi cuenta ta espacionan importante pa reflexiona tocante con por promove e balornan revolucionario di e fayecido dictador Fidel Castro.
E rindimento di cuenta ta presenta pa e regimen Cubano manera un forma den cual e pueblo por participa den e ehercicio di gobierno. Sinembargo, e poblacion ta percibi e proceso manera un formalidad na cual nan ta asisti pa no señala nan mes y den cual e supuesto dialogo cu e delegado ta poco mas cu un pantomina politico.
E percepcion di e poblacion den e dos añanan cu transcuri desde e ultimo eleccionnan legislativo ta cu e delegadonan a ripiti e comportamento habitual den nan funcionnan dentro di e regimen Cubano: vota pa unanimidad y hustifica e problemanan socie-economcio cu e argumentonan habitual dicta pa e Palacio.
