Proceso di inventarisacion a cuminsa den refineria: Negociacion di Citgo su debenan ta keda den man di RdA y Inspector di Belasting

Despues di e traspaso di e complehonan di refineria y terminal for di Citgo pa e compania estatal Refineria di Aruba (RdA), e fecha di 16 di maart ta esun cu a pone pa oficialisa e traspaso aki pa medio di e cancelacion di e acuerdo entre Citgo y pais Aruba.

Esaki unabes cu gobierno por keda cla cu e ley di terminacion, y cu esaki por keda aproba den parlamento. Pero tambe cu finalmente por resolve e debe di 36 miyon florin cu Citgo tin cu RdA y departamento di Belasting.

Prome Minister, Evelyn Wever-Croes a bisa cu Citgo ta den negociacion cu e dos partidonan aki. E ta aclaria cu e mes como minister no tin un rol den esaki. Pues como minister e no por bisa pa exonera of pordona e debe; of di otro banda, forsa Citgo pa paga nan debe. El a señala cu esaki ta un tarea autonomo di Inspector di Belasting.

“Unabes parlamento ta duna gobierno autorisacion pa termina e acuerdonan, nos por firma e acuerdo di terminacion cu Citgo,” el a bisa.

Unabes cu esaki sucede, gobierno lo tin e autopista habri pa busca operadornan nobo. Tanten, gobierno pa medio di su compania estatal RdA ta bay opera y mantene tanto e refineria como e Terminal Di Energia di Aruba (TDEA), cu a bira e compania estatal nobo cu 27 trahadonan actualmente pa opera e facilidad di e terminal, a traves di cual ta abastece nos pais di combustibel.

Premier Wever-Croes a laga sa cu e mesun dia cu Citgo a entrega e yabi di e compleho aki, e trabou di inventarisacion a cuminsa diasabra atardi mes, ora cu RdA a tuma e control over di e refineria. E ta spera cu e resultado di inventarisacion riba locual ta mas critico of urgente por bin cla e siman aki mes. Aunke e detayenan si por tarda un poco mas.

E mandatario, kende a yega di bisa cu e traspaso aki a tuma luga den un forma amigabel cu Citgo, no a referi na exoneracion of holiday tax otorga na Citgo pa locual ta su obligacion di pago di belasting. Pero tambe su compromiso cu RdA. E ta considera como un ‘pregunta crucial’ con pais Aruba ta bay compensa e perdida di entrada aki, y practicamente e batata cayente aki a wordo poni den man di departamento di Belasting.

E ta un suma total di 36 miyon florin cu ta basa riba 10 miyon dollar di belasting cu Citgo mester a paga anualmente, independiente si tabatin ganashi of no. Y otro 10 miyon florin tin di haci cu e pago di lease na RdA. E dos 18 miyon florin ta cera e suma di 36 miyon florin. RdA tin un aña cu no ta haya e pago aki pa concepto di lease. Pero ya caba e placa aki ta comprometi cu cierto pago di operacion y cu entrega di dividendo di RdA na gobierno, locual no a haci, ya cu e placa di Citgo no a drenta ainda.

E dianan a cuminsa core pa yega na e fecha stipula di dia 16 di maart cu lo marca e finalisacion oficial di e acuerdo di pais Aruba cu Citgo, pa medio di un ley aproba den parlamento. Premier Wever-Croes a bisa claramente cu loke Citgo ta debe te awor, tanto na departamento di Belasting como na RdA, nan tin ‘cu yega na un acuerdo cune cu e doñonan di curpa’. Esta cu RdA pa loke ta trata e lease y pa loke ta impuesto, nan ta papiando cu e departamento di Belasting.