Recientemente Prome Minister demisionario, Evelyn Wever-Croes (MEP) a reuni cu representantenan di eGovernment Academy di Estonia cu ta encarga cu e proyecto di digitalisacion di e aparato gubernamental. Nan tabata na Aruba pa asina tene diferente tayer cu diferente stakeholder cu ta bay traha riba e proyecto aki.
Durante e tayernan varios departamento di Gobierno tabata presente, specialmente esunnan cu nan servicionan ta e promenan pa wordo digitalisa. Tambe e representantenan a tene reunionnan cu otro stakeholdernan importante cu nan lo mester tin contacto cu nan, pa asina tur cos ta cla pa cuminsa.
Prome Minister a indica cu Aruba a haya un total di 14.5 miyon Euro di Union Europeo pa e proyecto aki, di cual 13.5 miyon Euro ta bay pa e proyecto y 1 miyon Euro lo bay entre Union Europeo y Estonia pa maneho di e proyecto. Cu e 13.5 miyon Euro, Aruba lo por yega hopi leu cu e digitalisacion di e departamentonan di Gobierno, pa asina comunidad di Aruba desde e comodidad di nan cas por haci mayoria di servicio y “follow up” riba nan peticion. Esaki lo scapa hopi tempo di e ciudadano, mirando cu e nan no mester bay para den rijnan largo pa un servicio of documento.
“Mi kier gradici Estonia eGovernance Academy pa a tuma e liderazgo di e proyecto importante aki. Nos tin tur confiansa cu tur cos lo bay bon, mirando cu nan tin hopi experiencia den e ramo aki. Tambe un danki na tur departamento di Gobierno cu a mustra nan disponibilidad, y tur e stakeholdersnan cu ta cla pa yuda cu esaki. Cu e proyecto aki, Aruba lo drenta den un era di digitalisacion, innovacion cu no lo yuda solamente pa e servicionan bay mas lihe, sino tambe pa haci nan mas transparente, evitando asina casonan di corupcion. Tambe e lo haci e servicionan mas eficiente na unda nos lo por bay traha cu un aparato gubernamental den termino mas largo, y menos grandi, y esaki ta loke nos kier pa Aruba”, Prome Minister a expresa.
