E caso contra e dos di e cinco polis envolvi den e morto di Mitch Henriquez (42) a cuminsa dialuna den un corte di siguridad maximo. E Arubiano a muri mas cu 2 aña y mey pasa durante un detencion violento na un festival na Den Haag unda despues un multitud di hende a subi caya protestando contra discriminacion y violencia di polis.
Den e prome dia e abogado di e famia Henriquez a trece dilanti evidencia nobo, esta grabacion miho cu miho audio cu ta capta e momento di detencion di sr. Henriquez. Segun nos partner den noticia Ret Karibense, esaki ta trata di imagennan original. Contrario na e imagennan cu Ministerio Publico (OM) di Hulanda a haya di recherche di Reino, e imagennan original aki segun abogado Richard Korver si ta cla y por tende bon kico ta papia.
E famia di Mitch Henriquez a haya e imagennan di un oficina di detective priva. Segun nan abogado Korver riba e imagennan aki ‘por mira bon con Henriquez su cara ta bira biña durante di e detencion y cu e polisnan ta wak otro spanta’.
Problema cerca recherche di Reino
Con por ta cu recherche di Reino no tin e imagennan aki ta e pregunta. Segun sr. Korver esaki ta trece ‘un problema na cla’. “Recherche di Reino a traha un compilacion malo di imagen cu obviamente no ta sirbi.” E abogado ta bisa cu e por entrega e imagennan dialuna ainda como documento di e proceso. E ke pa OM investiga e zonido y imagennan original mas aleu.
Corte a duna e abogado permiso pa entrega e imagennan como parti di e proceso, pero a dicidi di no wanta e caso pa esaki, locual e abogado tambe a pidi.
OM a dicidi di persigui dos di e cinco polisnan. Nan ta parce dilanti hues pa maltrato grave cu morto como consecuencia. Pero por sentencia e polisnan mas pisa tambe pa homicidio. E expectativa ta cu hues lo sentencia dia 30 di november. Na e momento aki e politico Arubano Desiree De Sousa Croes tambe ta na Hulanda pa sigui e proceso.
