Ultimamente un ciudadano a acudi na Bon Dia relaciona cu polis cu ta duna multa na automobilistanan cu ta core sin plachi di number. E ciudadano tin su sticker dilanti cu ta prueba cu el a paga su impuesto. Polis sin embargo a dun’e un multa pasobra ta ‘coriendo sin plachi cu ta identifica e vehiculo’.
Ministerio Publico ta splica riba derechonan cu bo tin si no ta di acuerdo cu multa.
Unabes un hende haya un multa anto e no ta di acuerdo cu esaki, e por simplemente keda sin paga Ministerio Publico anto presenta dilanti di hues. E ora e ta splica hues di trafico dicon e no ta di acuerdo cu su multa. Eventualmente por hiba pruebanan cual por ta fotonan, articulonan of documentonan.
Den un caso por ehempel un persona a haya un multa pasobra den trafico el a laga un nubia masha grandi di huma toxico riba un polis cu tabata bini su tras riba brommer. E persona aki a bay dilanti di hues pa splica cu ta imposibel pasobra a caba di service su auto. El a hiba papelnan di prueba y mustra cu su auto ta nobo pa argumenta su caso. Pa locual ta plachi di number, articulonan di declaracionnan di Departamento di Impuesto a yuda den e asunto aki. Un hues di trafico nunca ta bay castiga un hende pasobra el a presenta dilanti, segun OM. “E pio cos cu por pasa ta cu e multa ta keda mes halto of cu hues ta kita e multa.” Na otro banda si un hende su fecha a yega, e no paga ni presenta dilanti di hues, automaticamente ta bin 50% acerca di e multa. “E hende tin e derecho pa presenta dilanti di hues y splica su caso si no ta di acuerdo cu algo. Anto laga hues mes dicidi.”
