Diamars mainta, director di Inmigracion Aruba (IA), Sr. Andrew Hoo, a duna un conferencia di prensa tocante e procedura pa biaha cu menor di edad. Manera ta
conoci, tin diferente rekisito pa biaha cu un menor di edad, pues a delinea esaki mirando cu vakantie di scol ta den porta.
Cada aña, Inmigracion Aruba, ta confronta diferente caso caminda mayornan pa un of otro motibo no tin e documentonan necesario pa biaha cu un menor di edad, p’esey desde dos aña pasa e formulario di permiso ta obtenibel riba e pagina di Gobierno, esta: www.gobierno.aw , asina comunidad por download esaki facilmente ora ta biaha cu un menor di edad.
Segun director di Inmigracion Aruba, e procedura ta necesario, pasobra Aruba tin cu cumpli cu e reglanan internacional contra traficacion di hende (mensenhandel en mensensmokkel). Tambe, mester proteha e menor di edad di, por ehempel, secuestro.
Cada persona cu ta desea di biaha cu un menor di edad, pa cualkier motibo, sea vakantie, biahe di scol of biahe pa deporte tin cu yena e formulario “Toestemming reizen met minderjarig kind” (Permiso pa biaha cu un menor). Asina por demostra, ora di pasa control na Inmigracion, cu di berdad tin permiso pa biaha cu e menor di edad.
Un bes cu download e formulario, mester yena esaki completamente. Hunto cu e formulario, mester entrega e siguiente documentonan:
– Copia paspoort di esun cu ta duna permiso (mayor/voogd);
– Copia paspoort di acompañante;
– Copia paspoort di e menor di edad;
– Si ta aplicabel, copia di permiso valido;
– Si ta aplicabel, copia di gezag register;
– Copia di pasashi di regreso.
Banda di esakinan, ta posibel pa entrega e “geboorteakte” di e menor di edad, sinembargo esaki no ta necesario si cumpli cu e prome rekisitonan menciona.
Mester hiba e formulario y tur otro documento na oficina principal di Inmigracion Aruba pa control y stempel.
Inmigracion Aruba ta haci un apelacion na cada mayor/persona cu ta desea di biaha cu un menor di edad, pa tene cuenta cu e proceso aki por tuma tempo den e temporada druk di vakantie, pues ta sugeri pa hiba e formulario y tur otro documento, minimo 4 dia prome cu biaha. Di e forma aki, lo evita di haya problema y/of perde vuelo.
Keda pendiente pa ricibi mas informacion den e simannan nos dilanti.
