Jossy Kock di DOW,ta splica e procedura di seleccion di personal cu lo traha durante di e temporada di Carnaval. Esaki ta pa motibo cu tin diferente reaccionnan den medionan di comunicacion pa loke ta encera e procedura pa cual a scoge personal di DOW y contratistanan pa traha durante e periodo di Carnaval. Esaki ta segun e relato cu nos a ricibi.
Sr. Kock ta bisa cu na comienso di november 2017 a saca un lista di personanan cu ta dispuesto pa traha durante periodo di Carnaval. E lista aki a wordo cera na final di november y asina a evalua tur persona cu a inscribi pa traha durante e periodo di Carnaval. Durante di e proceso aki a tene na cuenta con e persona a traha durante henter aña, pa cual nan ta haya cierto puntuacion.
E aña aki pa prome biaha a scoge pa pone tur persona cu ta ambtenaar traha pa e prome parada cu tabatin (Parada di Flambeu). Pa loke ta e proximo paradanan, e aña aki lo bay traha cu un sistema di turno. Pa asina duna chens na otronan cu ta inscribi tambe pa por traha den e periodo di Carnaval.
Cada persona su trabou lo wordo evalua den e periodo, pa despues por sa con ta bolbe reparti e tareanan ora cu e paradanan grandi tuma luga, asina e ta splica.
