FADA problema di alcohol (1).jpg

E problematica di consumo di alcohol ta masha preocupante den nos comunidad, no solamente cerca nos adultonan sino cerca nos hubentud tambe. Investigacionnan cu FADA a haci riba nos isla ta mustra cu tin un uzo grandi di alcohol.

 

FADA a base di nan investigacion tin cifra cu ta mustra cu e consumo di alcohol ta halto. Mirando e problematica aki, FADA hunto cu otro instancia lo bin cu un campaña grandi tocante prevencion, y muy particularmente pa conscientisa pa stop di core auto bou influencia di alcohol. Nan ta observa den medionan di prensa cu uzo di alcohol den weekend cerca e automobilistanan ta hopi halto.

 

Tambe nan lo pone atencion riba e muchanan cu ainda no a cuminsa bebe alcohol. FADA lo bin cu un proyecto pa nan cu ta bay cuminsa 2017. Nan ta bay bishita e muchanan di scol basico pa asina conscientisa nan pa nan keda leu di uzo di alcohol, pasobra e tendencia ta cu nan ta cuminsa na jong. El a bisa cu tin un grupo di hende adulto cu ta dificil pa nan stop di uza alcohol. Pero pa e grupo specifico aki nan tin un campaña special pa nan tambe.

 

Siman di Cita Cora

Anualmente FADA tin su siman di Cinta Cora y na aña 2016 nan lema ta “Yolo Be Drug Free”. Den cuadro di nan campaña di conscientisacion FADA lo bin cu informacion casi tur dia den medionan di comunicacion. Tambe nan lo bay diferente empresa y hotelnan cu nan ta bin bishitando pa duna nan charla riba tereno di adiccion, specialmente riba problematica di consumo excesivo di alcohol.

 

Director di FADA Juendel Sprok a bisa cu e nomber “Yolo” ta conoci den e ambiente di nos hubentud caba, pero nan a bin cu un toke mas positivo di e nomber aki. “Caminda un biaha bo ta biba berdad, y bo tin cu biba liber di droga”, el a bisa.

Mas cu 20 aña pasa FADA ta bin realisando e campaña di cinta cora cu originalmente a cuminsa na Merca, pa honra e memoria di un funcionario di DEA cu a wordo asesina pa cartel di droga na Mexico.

 

E siman aki nan ta dedica pa trata diferente topico cu tin di haber cu adiccion ya sea di droga y alcohol. Tambe nan ta bin cu e siman di “Bisti na Locura” cu ta un campaña cu FADA ta bin realisando for di 4 aña pasa. E ta un campaña cu a bira popular, y e biaha aki nan kier acerca famia pa participa den e evento aki.

Den nan Siman di Bisti na Locura -cu ta entre dia 24 pa 28 di october- FADA ta desea pa pueblo en general enfoca cada un dia di bisti algo cu normalmente bo no ta bisti. Riba dialuna tur hende lo por bisti na cora pa bisa no na droga. Pa diamars nan tin e mea colorido. Pa diaranson FADA kier pa cada miembro di nos pueblo sigui bo soño; pa ehempel bo kier ta un super heroe, of bo tin un profesion, bisti di e forma ey. Pa diahuebs cera un team y bisti uniform di un deporte cu bo ta gusta; y pa diabierna  nan kier pa pueblo uza su credibilidad pa bisti algo cu ta haci referencia na nan slogan “Yolo Be Drug Free”.

 

Tambe nan ta invita pa cada famia dorna nan cas uzando e cita cora y nan slogan di e aña aki. Tur hende por participa, manda bo potret di bo grupo of di bo cas y share riba e Facebook di FADA ; y asina bo por participa na varios premio te cu dia 31 di october.