Tin un carencia di colaboracion den e parti di husticia y psikiatria pa ora ta trata cuido mental. Pero segun psicologo Dimitri Halley, e ta opina cu tin un aliansa actual cu no ta sano entre nan dos. E psicologo ta splica cu psicologia mester cuminsa hunga un rol mas grandi den nos comunidad pa trata cu problemanan mental/social.
Manera cu nos a informa siman pasa, sr. Halley a trece pa dilanti cu aworaki e modelo cu ta wordo uza pa trata cu hendenan cu ta na KIA pero cu tambe tin problema mental y di adiccion, ta mas medicina. E ta enfatisa manera nos a publica den e ultimo entrevista, na Aruba no tin cuido mental manera mester ta.
E scolnan a cuminsa sinti efectonan di esaki pero tambe husticia, mediconan y tur otro caminda . “Anto e ta bira impagabel y no lo por maneha esaki tanten cu no sinta serio primordialmente cu hendenan cu nan estudio ta bay riba e mente anto dialoga cu nan. Un psikiatra no a siña pa psicologia.”
Conflicto di interes
“Ta un tipo di conflicto di interes bo por bisa pasobra awor cuido pa adicto ta cay bao ministerio di Husticia. Kiermen bo tin cu wak e ora ey, si bo maneho ta pa sigui brinda remedi pisa asina ki, ora tin explosion volcanico den sociedad bo tin dos pechi bisti,” sr. Halley ta comenta. Aworaki tin un colaboracion cu intencion di expande esaki den termino di remedi psikiatrico y problemanan di hendenan cu ta criminal. Pero nan mester bay mas den un solucion psicologico segun sr. Halley pasobra e solucion psikiatrico ta ‘volcanico’.
Psikiatria y psicologia ta diferente
E ta splica nos cu algun maestro di scol no ta compronde suficiente pero mayoria sa si cu nan no por anda cu e problemanan di comportacionnan Mediconan tampoco no tin suficiente conocemento di psicologia segun sr. Halley, pa un of otro manera e psicologonan a wordo poni un banda. AZV no ta cubri e tratamento y bo ta sigura solamente ora bo tin un seguro extra. “No tin hustificacion. Pasobra si bo ta bisa cu bo kier un trayecto adicional den nan estudio, mester a percura pa esey. Nos tin 15 aña minimo ta sclamando riba e tereno aki. Aworaki practicamente e seguro ta duna bo cobertura pa solamente e psikiatra.” E ta sigui bisa cu awendia e psikiatra ta practicamente papia tres minuut cu e pashent anto e ta dun’e pildonan. “E no ta bay traha na e fundeshi di e problema.” Sr. Halley ta splica nos cu a bini un tipo di confusion pasobra psikiatria a drenta e mundo medico. “P’esey nan ta mas lihe wak problemanan mental como chemical imbalances. Pero esaki ta un reflexion di un psychological imbalance. ”
Problema social
E ta sigui bisa nos cu problema social tambe ta uno psicologico. “Esaki ta bon pa partidonan politico tuma nota di dje mirando cu nan ta uza hopi e palabranan problema social. Pobresa por ehempel no ta djis economico. Pobresa ta un tipo di mentalidad.” Sr. Halley ta sigui elabora riba e ehempel aki bisando cu si bo a lanta cu un mama, tata of wela cu tur tabata pensa cu nunca nan lo por sali for di pobresa, esaki ta keda programa cu bo.
“E ta deep programming con bo ta lanta como un mucha y kico bo famianan tabata hinca den bo cabes. Mayoria di nos tin tambe programacion religioso cu ta devastado y cu tin e pueblo completamente confundi. Y no tin nada pa trata cu e nivel di e problema eynan.”
Celebro no ta e mente
Sr. Halley ta splica nos cu e colaboracion entre psikiatranan y psicologonan no ta mucho bon. Hopi ta kere cu problema mental ta un problema celebral, pero Halley ta enfatisa cu e celebro no ta e mente. “Esaki ta cosnan cu ta conoci mundialmente caba. E cos aki ta old school pero e ta bon pa negoshi.”
E ta sigui bisa: “Departamento di Asuntonan Social tin un par psicologo y terapista relacional. Pero scucha esaki atrobe: of nos ta hink’e den e skina psikiatrico of den e skina social. Asuntonan Social tampoco no ta compronde e problema realmente pasobra atrobe e problema ta psicologico, e no ta social.” Sr. Halley ta bisa cu si bo percura pa hisa sueldo minimo of percura pa bijstand of purba di yuda nan cu trahado social, esaki no soluciona e problema ainda.
Post Slavery Syndrome
Un mayor cu a wordo abusa sexualmente, ta probabel cu e ta bay abusa di su yiunan segun sr. Halley, nada no lo por stop esey. “Un hende cu a lanta cu programacion di pobresa no lo sali cu djis ayudo di bijstand. E palabra ta mental set. Si bo no tin e mentalidad corecto, no tin nada cu ta bay cambia e ruta di un persona asina. E cos aki ta inter generational. E herencia psicologico cu abo ta haya di bo mayornan, ta bin di nan mayornan etc.”
Sr. Halley ta conclui mencionando e ‘Post Slavery Syndrome’: “Mas cu abo no a lanta den sclavitud, el a wordo pasa pa bo den e sistema di creencia. No ta por nada cu bo ta saca un persona por ehempel for di un bida di caya. E ta bay hopi mas profundo. Anto ningun instancia no tin e comprension ni capacidad pa trata cu cos aki. Nos ta djis purbando di trata cu e efectonan di e expresionnan, pero cuanto hende ultimamente bo ta bay por pone den KIA?”
