Empleadonan di Departamento Meteorologico Arubano a manda un carta pa prensa awe mainta relaciona cu locual a pasa ayera den nan kantoor cu computer destrui. Segun e comunicado, ta asina cu director Marck Oduber a tuma contacto ayera durante oranan di mainta cu polis y medio di comunicacion 24ora. Esaki tabata pa informa nan cu lo tin un supuesto computer di DMA cu lo a wordo destrui.
“Nos di Meteo kier resolve e problema aki masha simpel mes. Nos ta invita tur prensa pa pasa libremente mas pronto posibel na nos oficina pa asina wak cu propio wowo cu e computer ta den condicion perfecto,” e comunicado ta bisa. Nan ta sigui agrega cu tin hopi descontento contra director Marck Oduber ultimo añanan caminda cu comienso di aña aki, empleadonan di Meteo hunto cu sindicato TOPA y minister di transporte Mike de Meza a sinta na mesa. Un di e puntonan durante e reunion aki tabata ‘tres camara ilegal’ cu a wordo instala door di Marck Oduber den oficina di Meteo.
Sr. Oduber a haya peticion direct di minister de Meza pa kita e tres camaranan aki cu segun empleadonan: “obviamente ainda e no ta contento cu esaki.” E empleadonan ta subraya cu problemanan na Meteo ta escalando dia pa dia mas y tur esaki ta cuminsa y caba rond di director Marck Oduber. Empleadonan di e departamento ta enfatisa cu e computer cu aparentemente a wordo reporta destrui ayera, ta den mesun condicion cu ora el a wordo cumpra poco luna atras.
Nos lo tuma contacto cu e departamento y director pa informa mas riba e situacion.
