Prome indicacionnan ta bon pero no suficiente
A pesar di cierto critica di banda opositor, nos por mira cierto diligencia den e tareanan riba tereno di infrastructura y maneho di desperdicio. Asina recientemente e ministro encarga a duna un bista di kico lo por bay sucede riba tereno di mehoracion di procesamento di desperdicio, den cual a cuminsa atende e problemanan existente. E decision pa no hiba gran parti di e desperdicio cu nos ta produci tur dia mas pa Parkietenbos ta un paso logico. E pregunta ta naturalmente kico ta haci cu esey seguidamente. Segun nos ta comprende e idea ta pa hiba un parti grandi pa un sitio nobo na Sero Teishi, unda ta procesa e material asina leu cu e por bay empaketa bao tera. Esaki por bay haci na otro sitionan tambe, unda tin buraco grandi den tera, unda a coba pa saca piedra o greis den pasado. E sitionan aki lo no tin otro uzo actualmente, y despues di yena nan por haya uzo manera pa recreacion.
Tur esaki ta zona bastante positivo, y sigur a corto plaso ta brinda un rosea pa nos busca un solucion mas definitivo. “Un solucion mas definitivo? Nos a pensa cu esaki ta e solucion definitivo,” ta e observacion cu nos por a tende ultimo dianan. Honestamente, nos no ta kere esey. Laga nos splica. A pesar cu Aruba tin un cierto cantidad di e buraconan aki, no ta tur lo ta apto pa usa como landfill. Y pakico no? Pasobra cu tempo e material den cual e sushi ta paketa lo deteriora y e contenido dañino por bin den contacto cu awa. Di e manera aki e material toxico cu tin por bay otro caminda unda e presencia ta mas dañino ainda cu unda a dera e material. Laga nos duna un ehemplo. Si uza e cobanan grandi cu tin na Fontein y na Drumidera pa dera desperdicio, nos no mester lubida cu nan ta parti di e planicie di calichi, cu ta duna bida na e wowo di awa di Fontein, y den pasado na mas di un pos di awa dushi na e partinan rond di e ‘skerpi’ aki. Di mes caba tabata totalmente iresponsabel pa hamas a duna permiso pa coba piedra aki, pasobra esey riba su mes caba tabata un menasa grandi pa un di e poco recursonan natural bunita cu nos tin, cu e ta fuente di awa dushi na Fontein. Awor, si nos bay yena e tipo di sitionan aki cu desperdicio, cu tempo nos lo percura pa contamina e awa dushi aki pa centenares di aña, si no ta mas.
Igualmente den e partinan mas cerca di costa, unda tambe tin un planicie di calichi, y ademas awa na algun metro di profundidad, no lo ta recomendabel pa dera sushi. Tambe mester tene cuidao cu sitionan den vecindario di saliñanan (wetlands), unda e mesun peligro di filtracion aki por tuma luga cu tempo. Ta keda sitio anto, unda cu cierto certeza por dera sushi sin peligro di filtracion despues pa lugarnan unda hende ta biba o ta probecha e awa disponibel den tera? Nos no sa, pero e pregunta ta si den e estudionan haci te awor a tuma e aspectonan aki na consideracion.
En todo caso, loke nos no a tende ainda, ta tocante e posibilidad di minimalisa e cantidad di desperdicio cu nos ta dera, a traves di exportacion di tur material cu ta interesante y rendabel pa exporta. Pa por haci esaki na un manera manehabel, lo ta necesario pa bin cu un sistema di recolecta desperdicio unda ta separa esaki na cas caba. Atrobe, nos sa cu esaki no ta tema popular, pasobra lo mester molestia e ciudadano cu asunto cu ta exigi accion y compromiso di e persona individual, pero ta importante pa yega na claridad riba e asuntonan aki. Pero e ta parce nos importante, pa e simpel motibo cu nos produccion di sushi ta asina impresionante, cu mester considera saca mas tanto posibel material cu a drenta Aruba, pa exterior atrobe. Ban spera cu pronto nos ta mira un presentacion mas integral cu ta tuma tur e aspectonan aki na cuenta.
E otro problema grandi cu e mesun ministro mester maneha, ta e asunto di tereno. Su diligencia den trece orden den e caos di DIP no a pasa desapercibi, pero aki tambe ta keda pregunta. Por ehemplo, con ta bay habri un proceso nobo di peticion, si nos tin caba mas di 10.000 peticion entrega pa haya tereno, y no tin tanto. Nos ta na altura cu e ministro a toca e tema delicado caba, cu no por sigui emiti tereno manera den pasado, pero mester cuminsa pensa na construi bay halto. Nos ta aprecia su sinceridad den esaki, no ta tur lo a haci esey, pero ta keda e pregunta te unda ta posibel ainda pa cumpli cu deseo di ciudadanonan cu a entrega peticion, sea recientemente, o dies aña pasa. Ademas, a base di e derecho di peticion, hancra den nos constitucion, no ta posibel pa simplemente nenga di tuma peticion nobo, cu consecuencia cu e problema ta persisti, cu of sin bon boluntad pa atende e asunto dificil aki. Nos lo ta pendiente.
