Hopi tabata y ta e comentarionan cu a sali den e dianan aki den media tocante locual a tuma luga na Tanki Flip dia 10 di mei ultimo, unda cu polis a drenta un cas/cura di cas y a haya un situacion hopi penoso cu un cantidad di bestia, mas tanto cacho, no den bon estado.
Animal Rights Aruba (ARA) a scoge pa warda algun dia pasa pa por a reacciona ariba e situacion, pa busca mas informacion y tambe laga e inkietud calma un poco. Awe pa medio di e articulo aki ARA ta trece su punto di bista (den corto) dilanti. Manera nos tur sa caba na e cas na Tanki Flip a haya un situacion hopi alarmante. E meneer y señora cu ta biba na e cas aki tabata doño di un hotel pa cacho, pero despues di algun tempo esaki no tabata cana bon mas y e situacion di e persona- y e bestianan a cuminsa bay atras pa lastimamente yega awe na e extremo aki. E situacion aki no ta solamente tristo pa e bestianan pero tambe sigur tristo pa e personanan cu tabata biba den e ambiente aki.
E intencion di e personanan aki tabata uno sigur bon, pero lamentablemente nan no por a tene e situacion mas bao control y esaki a sali for di man. Ta hopi ta esunnan cu a hiba entre otro cacho(nan) na e “hotel” aki, sea cacho(nan) di nan mes of cacho(nan) di caya y nunca mas a bay busca nan bek, cual ta haci a nan mesun responsabel/culpabel pa cu e situacion cu a haya na Tanki Flip.
E problema na Tanki Flip ta un caso di problema social na unda e personanan aki no a ricibi e ayudo necesario y a wordo neglisha, cual a conduci na e problema di negligencia di e animalnan tambe. Diferente fundacionnan tabata purba na yuda pa poco poco re aloca e cachonan di Tanki Flip, pero esaki no tabata facil mirando cu shelter y fosternan ta completamente yen. Hasta tabata tin un reunion cu varios boluntarionan di diferente fundacionnan, unda tambe miembro di polis a wordo invita, pa hunto pensa y bin cu un plan con lo por bay yuda resolve e problema aki.
Un cos cu ta sigur di lamenta ta cu dia di e accion ni un fundacion a wordo poni na altura pa wak si ainda por a re aloca algun di e bestianan, paso sigur lo tabata tin basta cu por a wordo salba. Hopi di e cachonan tabata mustra malo pa motibo di sarna y mal nutricion, pero esaki ta condicionnan cu por drecha cu e cuido necesario. Sinembargo e team cu haci e accion a scoge pa via un “quick scan” dicidi cu entre otro tur cacho tin cu wordo mata. Pa haci e “quick scan” aki no a involucra niun veterinario (independiente) of un fundacion pa por duna un conseho tocante e condicion di e animalnan.
E modus operandi aki sigur no ta corecto y ta un violacion di derecho di bestia, en particular mirando e metodo cu a wordo uza pa mata e animalnan. E bestianan aki ta wordo inyecta cu un producto cu por ta solamente efectivo como un producto pa eutanasia humanamente si esaki wordo inyecta, na dosis corecto, poco poco y directamente den e ader. Si esaki no wordo inyecta corectamente e bestia lo sufri dolor excesivo prome cu e fayece. Esaki sigur ta inaceptabel, no etico y cruel. Pa añanan caba ARA y hopi otro fundacionnan cu ta traha na bienestar di bestia ta bringando e metodo aki. ARA a adresa e punto aki varios biaha caba cerca diferente gobernante y instancianan, pero te ainda sin un resultado positivo.
Esaki sigur ta keda un punto di preocupacion unda lo mester yega na un cambio mas lihe posibel. Locual a pasa na Tanki Flip Ta contra tur derecho di bestia y no mag di ripiti su mes nunca mas. Mesun cos cu locual ta pasando cu e bestianan for di “afmaakhok”. A yega tempo pa gobernantenan y tur instancianan concerni tuma e preocupacion aki na serio y cuminsa respeta derechonan di bestia y specialmente cuminsa actua! Djis pasa un ley no ta suficiente! Ademas prome cu a pasa e Ley di Cacho, ARA a presenta na fraccion di parlamento cu tabata ocupa su mes cu e ley aki, na Servicio Veterinario y tambe na minister un cantidad di preocupacion y consehonan con pa adapta e ley, pero lastimamente ni un di e consehonan aki a wordo teni na cuenta.
Hasta ARA a conseha pa tuma den e ley cu polis ta obliga pa envolvi un veterinario independiente (pues cu no ta di Servicio Veterinario) y ARA pa por evalua un caso di maltrato prome cu por bay over na pone e cacho (of otro animal) drumi. Esaki pa sigura cu e proceso ta cana corectamente y na un manera humano. Lastimamente e conseho aki, mescos cu tur ARA su otro consehonan, no a wordo teni na cuenta y a pasa e ley sin haci ni un di e adaptacionnan sugeri. Tin un cantidad grandi di fundacionnan y personanan individual cu ta haci nan maximo esfuerso pa por logra haci un diferencia ariba e tereno di maltrato di bestia.
Esaki no ta un trabao facil, specialmente si bo no tin suficiente boluntario, no tin (suficiente) fondo, no tin material, no tin espacio y no tin oido/interes pa tur nan preocupacionnan. E situacion haya na Tanki Flip claramente no tabata sano, pero no ta e persona(nan) aki ta e reis di e problema. E reis di e problematica grandi cu nos tin na Aruba encuanto e mal cuido y maltrato di bestia, ta cuminsa cerca cada un di nos mes, e mentalidad, e falta di educacion y sigur e falta di asumi nos responsabilidad. Nos mester realisa cu cada un di nos, incluso nos gobernantenan, parlamentarionan, comerciantenan, educadornan, mayornan, en corto cada un ciudadano ariba e pais aki, ta responsabel pa stop abuso di bestia na Aruba. Den un sociedad civilisa tin respet pa tur bida, incluyendo bida di un animal!
