Aunke diferente topico ta forma parti di e agenda cu ta wordo trata durante e ultimo congreso extra ordinario di sindicato FTA pa 2017, e topico relaciona cu problematica social ta esun mas principal.

Presidente di FTA, Hubert Dirksz a bisa cu e prioridad ta atencion na nos problematica social di tur indole. “Nos sa cu e situacion social ta hopi serio na pais Aruba”, el a bisa. Den e dia di apertura nan a haya un presentacion di trahado social Enid de Kort unda a wordo ilustra cu pa hopi aña gobiernonan, pero e ultimo gobierno sigur, no a duna prioridad na e desaroyo social. E ta alarmante, e ta birando mas serio y esaki tin impacto riba productividad laboral, segun sr. Dirksz.

Pero tambe gobierno mester pone placa y hende disponibel y traha hunto. Aunke e iniciativa aki mester bin di gobierno e ta haya cu nos no mester keda depende di gobierno so. Sino cu sindicatonan, gremionan comercial tambe tin un responsabilidad pa carga pasobra e problema ta multiple y compleho. “Un manera of otro mester yega na atende nan, pasobra e problemanan t’ey”, el a bisa.

Gobierno nobo
E veterano sindicalista a bisa cu tin hopi cifra cu ta mustra e problemanan aki y cada dia cu ta pasa sin atende nan, ‘nos ta hibando e pais aki den mal direccion’. E ta kere cu mester di diferente grupo pa atende cu cada un di e problema social di nos comunidad. Talbes e ta haya cu ta bon pa tin un plataforma nacional pa atende cu e diferente problemanan y aspectonan di nos pais, y no exclusivamente social, pero sin duda e aspecto social ta un prioridad.

A pesar di e experiencia di Dialogo Social den pasado, presidente di FTA ta haya cu ta importante pa bin cu un dialogo social pero sigur no cu e metodo cu a wordo uza anteriormente.

En todo caso e ta spera cu por tin un desaroyo miho. No solamente pa atende e problemanan pero e tabata auto critico pa bisa cu e ta concerni na e sindicatonan mes tambe, y di otro banda seriedad di dunado di trabou. “Dunado di trabou no por exigi y wak placa so”. Pasobra si bo tin un desaroyo social cu ta bay malo y bo tin situacion social cu ta hopi malo y cu situacion financiero ta delicado tambe esaki lo tin su impacto riba e comerciantenan. Pero si di otro banda nos no ta atende cu e situacion aki di un manera serio ‘na final nos tur ta sali perhudica.’

E ta haya cu gobierno nobo cu a wordo anuncia oficialmente ayera tin un reto masha grandi mes pa e situacion financiero. Tambe e situacion di criminalidad, cuido medico cu ta hayando hopi critica ultimo tempo. “Servicio di hospital no ta manera mester ta. Un hoben a fayece despues di cuater biaha cu el a bay poli”, el a bisa.

Na final di e congreso aki, FTA tin pensa di produci un documento cu lo contene algun puntonan cu nan ta considera relevante pa e gobierno nobo atende cu nan, ya cu durante e periodo di formacion di gobierno, FTA como e sindicato mas grandi, no a wordo invita pa reuni cu formado di gobierno.

Congreso extra ordinario
Esaki ta e di tres y ultimo congreso extra ordinario di FTA pa e aña aki. Den e agenda nan ta cumpli cu e reglamento di e sindicato aki ta exigi cu ta esun di duna cuenta na nan delegadonan. Tambe nan ta trata e presupuesto di 2018. Directiva di e sindicato mester duna cifranan aproba pa nan accounting di e relato financiero di e añanan cu a pasa. Nan no alcansa di bin cla cu e relato financiero di 2016 elabora pa PWC, pero si nan a duna un bista di e gastonan te cu luna di september ultimo.

Nan ta considera cu ademas di duna cuenta di e situacion di e comunidad unda FTA ta representa e trahadonan manera comision di SER, ILO, etc.. unda nan ta duna un bista di e situacion dilanti e delegadonan. Tambe nan a traha un relato di tur loke ta pasa den cada empresa cu nan ta representa nan trahadonan. Esaki ta duna espacio pa e delegadonan evalua nan pa asina mantene transparencia cu nan.

Otro aspecto cu nan ta considera importante como sindicato ta e servicio huridico cu nan ta brinda na nan miembronan y tambe trata e casonan mas lihe y efectivo pa nan keda satisfecho. Presidente di FTA a expresa su satisfaccion pa e presencia di hopi delegado sindical cu ta bin atende nan congreso extra ordinario di dos dia y cu ta clausura awe. El a elogia e echo cu FTA a haya bastante cooperacion di e dunado di trabou.

Sinembargo tin ainda algun compania cu ta haci dificil pa laga nan delegadonan participa. FTA ta keda asombra cu hopi biaha ta nos propio hendenan local cu pa un motibo of otro ta resisti e cooperacion di e delegadonan cu mester participa den e congreso. Sinembargo nan por haya un mayoria di e cantidad di empresa afilia na FTA, pero toch nan ta considera cu si tabatin un mayor cooperacion e grupo di delegadonan lo tabata mas grandi.