Ayera a keda introduci oficialmente e fundacion Jordan Ling cu a bira un partner importante di instituto PAAZ pa realisacion un ‘awareness day’ dedica na salud metal cu lo tuma luga riba diasabra 22 di october awor cu participacion di varios orador.
E fundacion aki a wordo lanta pa honra e feliz memoria di Jordan Ling kende tabata yiu di Sr. Clifton Ling kende ta ex propietario di Ling and Sons.
Sr. Ling kende ta presidi e fundacion aki a gradici e instancianan cu a haci posibel nan participacion den e evenemento aki. Sr. Ling a declara cu hopi tempo e kier a acerca PAAZ, tempo cu nan a haya sa cu su yiu homber tabata sufri di un deficiencia mental.
“Pero mi no tabatin e curashi pa acudi cerca nan. E encuentro a wordo acelera dia cu nos a haya sa e tristo noticia cu nos yiu a tuma su bida door di su malesa”, Sr. Ling a bisa.
Nan a bin cu e fundacion aki pa asina nan famia sa kico nan por nifica na e institucion PAAZ. Ta asina cu for di inicio di 2016 nan a lanta Jordan Ling Foundation pa promove actividad rond salud mental.
Mental Health Awareness Day ta e prome actividad cu nan ta proyecta pa medio di e fundacion aki. E fundacion tin como meta principal pa yuda mas tanto posibel pa promove cuido di hendenan cu ta sufri di problema relaciona cu salud mental na Aruba.
Ademas dor di e fundacion aki nan kier crea consciencia, promove y expande e conocemento riba tur sorto di malesa mental. Tambe e fundacion lo sirbi como un link di apoyo den e cadena di cuido y di varios disciplina profesional cu tin di haber cu e bienestar y interes di hendenan cu ta sufri di tipo di deficiencianan mental.
Na final, Sr. Clifton Ling den nomber di Jordan Ling Foundation kier invita pueblo en general pa acudi na un bon causa pa “asina purba y kibra e stigma y papia abiertamente di e topico cu ta regarda salud mental. E por toca cada ken…”, el a bisa.
