Problema pa hende local por cumpra un vivienda na Aruba ta preocupa

For di algun tempo caba, por mira publicacion di benta di viviendanan na Aruba unda cu prijsnan pa propiedadnan ta sumamente halto y cu un famia local no tin placa pa nan yega na mesun cas sea pa diferente motibonan como no por haya tereno, material di construccion ta mucho costoso of costo di bida ta sigui subi na unda salarionan tambe ta hunga un rol hopi importante pa por haya un hypotheek.

Tabata na 2019 ora director di Directie Infrastructuur en Planning (DIP) ken awor ta suspendi, a declara cu na 2018 nan tabatin un cantidad 14.700 peticion pa tereno for di aña 1990, cu na e tempo ey nan como DIP a sigura cu no por papia di reto di tereno sino cu nan tabata papia di un problema di vivienda na Aruba.

E problematica cu e isla tabatin y te ainda ta existi ta vivienda, pa via cu e cantidad di hendenan cu kier un vivienda ta basta grandi. Den e cuadro ey e director a comenta na e tempo ey cu nan a bay riba un maneho di dos banda. Di un parti nan mester a haci inslag ariba e cantidad di hendenan cu a pidi tereno y di otro banda, nan tabata pronostica cu a base di futuro y cifra nan por bay pa 2025.

Tabata dia 14 di juni 2021 ora e proyecto Caribbean Town Villas and Appartments tabata haci e anuncio di su proyecto di viviendanan den forma sostenibel y moderno pa atende cu demanda di cas pa futuro y na october di 2022 Gobierno di Aruba a informa di e groundbreaking dunando inicio na un “era nobo di vivienda pa comunidad local” unda e cual e propiedad tin un costo for di 135.000 dollar bay ariba dependiendo di e tipo di vivienda cu nan ta ofrece entre apartamentonan, villas y town houses.

Par di dia pasa e proyecto a anuncia un aliansa cu companianan di real estate di Aruba pa asina ey no solamente esnan cu tin pendiente un peticion pa tereno na DIP sino tambe tur residente por cumpra den e proyecto aki segun loke nan mes a sigura.

Algun cierto comentario riba rednan social a trece dilanti cu hendenan local no por yega na su mesun cas cu prijsnan halto cu viviendanan tin awor na Aruba, ademas di esey tambe ta indica cu financing y maintenance fee cu ta costa entre 150 pa 750 florin pa luna.

Entre comentarionan riba rednan social tambe ta bisa: “Mi tin echt duele cu mi paisanonan! They’re selling everything to foreigners! Paso pa hende nan manera nos cu ta biba afo, e prijs nan ta AMAZING! Pero p’e local nan, cu mayoria ta gana salario abou y no por fia mas cu 200.000 florin, e prijs nan ta mucho halto. P’esey awo nan ta bende nan cu hende nan di afo. P’esey e post ta na Ingles. E proyecto nunca a wordo traha cu local den mente. Let’s be honest!”

“Caribbean Town tabata un proyecto cu Haime Croes di DIP cu aprobacion di Gobierno, a apoya, a promove como e alternativa pa Arubiano yega na un cas. E tabata cay bou di e pensamento cu mester cuminsa bay halto, pasobra no tin suficiente tereno pa erfpacht. FCCA y banconan lo tabata cla la duna hypotheek.. ta CON ANTO a diseña un proyecto cu ta riba e pay grade di mayoria Arubiano? ma compronde cu no mag bende cu stranhero, ni usa e apartamentonan pa Airbnb…Spera Caribbean Town y DIP clarifica.”

E problema ta sigui keda na unda den comunidad e sentimento di no por haya un tereno pa construi un cas ta dificil debi na peticionnan pa tereno na DIP a keda atrasa, pa otronan por haya un hypotheek tambe ta dificil conforme cu loke nan ta gana como salario, por ehemplo, un persona cu un salario minimo di 1.700 florin no por bin na remarca pa un hypotheek di casi 500 florin pa luna (por ehemplo) unda cu mester paga ademas di servicionan, impuesto y otro gastonan adicional.

Di mesun manera tambe por lesa comentarionan riba rednan social di Fundacion Cas Pa Comunidad Arubano unda nan ta huur casnan di un camber dirigi pa hendenan di mas di 55 aña unda e prijs pa huur ta di 1.475 florin pa luna mas 35 florin extra pa servicio di septic, loke pa algun usuarionan a causa un disgusto y nan ta señala como “abuso di un fundacion cu ta supose di yuda comunidad haya cas pagabel,” un usuario a skirbi.

Ademas di esey, tambe por mira cu companianan di real state ta bende casnan of condominionan na prijsnan hopi halto unda cu e unico cumprado por ta esnan cu ta biba afo cu por paga e prijsnan na dollar mientras cu hendenan local no ta haya mucho opcion pa cumpra un cas y mester keda tur luna pagando un huur caminda nunca e lo no bira doño di e cas ey.

Preguntanan ta bin dilanti como pa ki dia lo por tin un control pa regula e prijsnan y asina hendenan local por haya un cas na un prijs “accesibel” conforme loke nan ta gana den un luna, si instancianan concerni tin mas plannan di desaroyo habitacional pa tur hende, sea local of stranhero cu e obhetivo di construi viviendanan acorde pa famianan di Aruba cu no ta gana na dollar pero cu si tin e soño di haya nan mesun cas.