Ultimamente a surgi problema serio cu awa sushi na diferente lugar, indicando fayo den e sistema di riolering. Un di e lugarnan unda tradicionalmente despues di cada yobida tin awa acumula ta dilanti Riu Hotel.

Normalmente ta warda te ora awa stop di yobe y e caminda keda seco riba su mes. E problema actual ta diferente, ya cu awa no a yobe pero aparentemente e awa ta bin di den e saliña banda pariba di caminda, cerca di Courtyard. Actualmente ta sacando e awa sushi aki cu truck hiba pa otro destino, pero no ta parce un alternativa aplicable pa semper. Ademas esaki ta indica cu por lo pronto no ta mira otro solucion tampoco.

Ta bira tempo pa busca un solucion mas permanente pa e sitio aki, sea cu ta yobida of no. Pa automobilista e ta un inconveniencia menor, pero pa ciclista, y awendia tin hopi mas turista y local ta core bicicleta den e vecindario ey, e ta un menaza di salud pa core den e awa contamina ey.

Un situacion similar o parecido tin algun dia caba dilanti Bestuurskantoor, unda awa sushi ta bin halto for di e sistema di riolering. Como cu no ta mira problema similar mas den direccion pabao, bayendo pa Bubaliplas, ta supone cu ta trata di un obstaculo na e lugar mes den e tuberia. E pregunta ta anto pakico e problema no ta haya solucion, mirando cu esaki tambe ta un prime spot pa local y turista, ademas cu no mester warda pa e cosnan aki ‘resolve nan mes’.

Ta parce cu e problema di e sistema di purificacion di awa na Bubali no tin solamente un problema di capacidad di purificacion, sino cu ta bira visible e consecuencianan di mal planificacion. Na momento cu e nivel di e lagun bira demasiado halto, awa ta filtra pasa bao di e caminda grandi bay pariba den e parti di e saliña eynan. E ta bira un problema pa e viviendanan na e lugar y probablemente tin relacion tambe cu e asfalt di e autopista na e altura ey, cu ta habriendo totalmente for di otro. Esaki tambe lo bay exigi un solucion mas duradero pa para e deterioro rapido di e caretera, cu ta core pasa meymey di e saliña.

Tanto aña despues di e decisionnan tuma ta surgi e pregunta pakico a planifica vivienda den un saliña, cu ta solamente un fraccion mas halto cu nivel di lama. Henter e area ey ta saliña y ta pesey a scoge e lugar pa traha e reserva di awa procesa di e instalacion di purificacion. Pero no ta parce logico pa usa e mesun area ey pa diferente funcion. Si nivel di lama sigui subi, loke ta parce solamente un cuestion di tempo, esaki ta bira un problema pa e hotelnan, pero promer cu esey pa e construccionnan den e saliña. E hotelnan ta traha loke ta yama na Hulandes e ‘strandwal’, cu ta un poco mas halto y tabata forma e barera natural tras di cual e saliñanan a surgi. Nos conoce e fenomeno aki riba henter e zona costal, di Arashi te Playa.

Fuera di e problema di mas capacidad di purificacion di awa sushi, pa atende un demanda hopi mas grandi, tin e problema tambe di necesidad di mas saliña pa warda awa, of mester cuminza manda mas awa – purifica debidamente – pa lama, pa mantene e sistema na Bubali na un nivel cu no ta problema pa e otro actividadnan cu di tur manera ta den e saliña.