Keto bay sushedad ta keda un problema grandi rond di Aruba y den diferente medio di comunicacion cu dumpnan ilegal a cuminsa aparece mas y mas. Desde e ciere di dump na Parkietenbos comunidad ainda ta buscando informacion pa loke ta trata desperdicio y sushi, unda mester benta esaki afo.

Robby Rosel, vocero di Bureau City Inspector (BCI) a indica cu esaki no ta prome aña cu tin e problema di sushedad rond di Aruba, no solamente pa motibo cu dump a cera, pero esaki ta un tradicion di tur aña cu BCI ta encontra cu gran cantidad di sushi rond di Aruba.

Den un conferencia Rosel a splica cu nan a ricibi notificacion ariba e plataforma FIXI cu riba e veld di bala di Pepsi, na San Nicolas, tin hopi sushedad y ora cu e inspectornan a yega nan a constata cu en berdad tin hopi sushedad ariba e veld y tambe full ariba e ruta, e caminda di tera, cual ta un tradicion pa basta tempo caba cu e hendenan ta tira nan sushedad y aworaki el a bira mas hopi.

El a indica cu di biaha e ploegnan di BCI a cuminsa cu e limpiesa aki y e inspectornan di BCI tin cu haci e parti di trabou di investigacion pa asina nan por yega na sa ken ta esnan cu ta tira e sushedad aki.

Rosel a remarca cu nan ta sumamente contento di por a ricibi un cantidad di recibo di diferente persona cu ta sirbi como prueba y otro siman lo cuminsa cu e investigacion caminda esun cu a paga pa tira e sushi afo of esun cu a tira e sushi afo, lo haya un boet. .

“Simplemente mi kier a pidi esnan cu nan nomber ta aparece den e recibonan aki prepara bo cartera, prepara pa paga un boet pasobra nos tin cu cuminsa bira severo riba esakinan mirando cu e ta bira un tradicion cu sushedad ta wordo tira riba veldnan di bala, riba camindanan cu autonan ta circula,” el a enfatisa.

El a agrega cu e inspectornan ta bay haci e investigacion pa asina poco poco nan por finalisa esaki. El a informa cu esaki ta un di e trabounan cu sigur BCI lo tarda un pa dos siman ariba esaki pa nan por haya tur e nombernan di e personanan y nan lo bay ricibi e bishita.

Rosel a remarca cu na banda di esey nan ta practicamente cla caba pa pone camara den San Nicolas tambe pa nan por sigui vigila y asina nan por gara e personanan cu ta tira e sushi aki di cerca tambe.

No ta di aworaki e problema aki ta, el a señala cu nan tin mas o menos un cinco pa seis luna cu tur siman mester manda un ploeg pa haci e camindanan limpi caminda turistanan ta frecuenta. Mescos ta pasa den e dam di Hooiberg, dam di Tanki Leendert, den Bushiri, na Santa Cruz y hopi otro mas caminda rond di Aruba. .

“Mi ta pidi comunidad di Aruba pa sigui manda informacion ariba FIXI pa asina BCI por hay’e y pa nos por aborda e trabou aki pa nos por mantene Aruba limpi,” el a declara.

Plataforma FIXI ta e sistema nobo cu a wordo introduci pa e Ministerio di Medio Ambiente cu ta disponibel pa cualkier persona na Aruba cu kier trece nan reclamo pa dilanti di tur locual cu ta encera sushedad y BCI lo comparti e trabou na cada departamento. Apart di e plataforma FIXI tambe por yama BCI na 582-9777 pa informa di nan reclamo.

Rosel ta aclaria cu mientras nan tin pruebanan automaticamente e inspectornan por duna e personanan aki un boet. Pero locual ta pasando aworaki ta cu por ta un persona ta paga pa e servicio pa nan tira su sushi afo y e no ta na altura unda esaki ta wordo tira. Pero na final di dia practicamente e persona cu su nomber ta riba recibo ta esun cu ta haya e boet, no esun cu a tira e sushi afo.

“Esaki ta bay bira un accion hunto cu e ploegnan pasobra asina nos por yega na suavisa e sushedad cu tin rond, cu ta wordo tira den mondi of riba e caminda na unda cu, principalmente, e camaranan lo wordo instala,” Rosel a enfatisa.

Rosel ta subraya cu no ta pasobra dump a cera, e desperdicio ta wordo laga of e persona por haci cune loke e ta desea. Dump a cera pero Eco Tech ta tumando sushedad y e autonan di Serlimar ta den funcion ainda kiermen e sushedadnan di cas tur cos ta core normal y no mester tira esaki den mondi.

Rosel a recorda cu tin diferente manera cu por deshaci di desperdicio. “Nos ta bolbe bisa, bo boternan di refresco bo por haya placa pe, bo boternan di cerbes, tur esey bo por hiba nan. Nos tin Apex cu ta pa bloki, tera, santo, tur esey. Eco Tech tambe, bo ta separa bo sushi y bo ta hiba nan y deposita nan aya y asina nos tur ta mantene nos Aruba limpi.”