‘Problema di riñon na cualkier edad’

ORANJESTAD – Den un reciente entrevista cu Kidneys297, Miluska Sneek, kende ta presidente di e fundacion, a papia tocante e daño y efectonan pa riñon ora di bebe di remedi mescla cu alcohol.

Sneek a bisa cu durante e temporada di carnaval, ta haciendo un campaña hunto cu FADA pa asina trece dilanti e informacion tocante e consecuencianan y efecto cu por trece si persona bebe remedi y tambe alcohol hunto.

Sneek a bisa cu pa nan e ta dificil pa bisa cua remedinan por tin consecuencia. E motibo ta cu riñon tin cu garna e tablet y remedi, y e no por pasa den e filter. E ta bisa cu e por bira un problema si bebe hopi di dje y ta keda pega. Por daña e organo, y den combinacion di alcohol, ta haci e proceso pio.

“Locual nos purbando pa haci cu FADA pa nan ta mas tanto e parti di alcohol. Nos como fundacion kier proyecta pa nan por mira e efecto riba nan riñon. Aparte cu e curpa y salud ta bay atras. Esey ta trece efecto grandi den e funcion”, Sneek ta splica.

Bon Dia Aruba a puntra, ya cu tin hende cu ta lesa e bijsluiter, anto si e remedi ta bisa cu no ta problema cu alcohol, con ta bisa nan cu si? Sneek ta contesta cu di mes alcohol ‘no ta bon pa curpa automticamente’ e momento cu ta bay uza alcohol caba ta ‘bay robes’.

Den e parti si bay haci esey den combinacion cu remedi, maske e remedi no bisa cu e ta malo, cu no tin efecto, ‘alcohol no tin garantia’. “Hende tin cu sa cu alcohol ta malo pa organismo cu no por cambia nada. Mescos hende ta bisa cu ta dal cerbes anto e ta likido, pero ki tipo di likido? Kico e ta bay haci cu e curpa? E unico cu e ta yuda haci ta happy.”

E no ta yuda bo bira mas saludabel hunto cu e remedi. Of tene e organonan feliz. Sneek ta bisa cu e unico efecto ta cu e ta haci mas daño. “Abo ta scoge en berdad pa bebe locual bo kier bebe, pero nos ta conscientisa pa bebe awa, spula bo curpa, y no ingeri algo cu ta haci bo organismo malo.”

Tin cantidad di pashent riba lista di spera pa wordo atendi pa specialista, mas e dialyse pashent. Si ta algo cu por ser evita, miho esey ‘un costo menos pa AZV’.

E fundacion mes ta haci charlanan hunto cu actividad, sea riba nan mes of cu otro instancia, e ta pa tur edad. Dia 14 di maart mes nan tin ‘world kidneys day’ tur aña ta haci actividad pa keda conscientisa cada persona pa bebe awa.

Nan ta duna charla y parti awa na scolnan y comunidad como ‘actividad di wellness’. Mester keda corda hende cu riñon mester di aw,a ‘esey e organo so ta traha cune y nada otro’. Nan tin un buki pa mucha por compronde di kico e malesa ta y kico ta bin cune. Tambe ta organis caminata pa asina conscientisa.

Bon Dia Aruba a puntra si tin caso di mucha of hoben adulto. E ta contesta cu tin caso den tur edad. Tin persona ta nace cu e problema, tin muchanan cu for di trempan e riñon ta cuminsa faya pa motibo di un mal alimentacion.

Un persona mester por bebe 6 pa 8 glas cu awa. E ta bay pa 2 liter di awa pa dia, asina por spula e curpa.

E problema cu riñon si no ta mortal pero e ta un malesa cronico cu por wordo evita a base di alimento. Tiki ta esunnan cu a nace cune, pero mayoria di biaha ta descuido di sucu, presion y no bebe awa, ‘tur esey ta traha pa e riñon faya’.

Antes, complicacion tabata bin na un edad di 70/80 aña. Sneek ta splica awendia e malesanan aki ta bin di un edad trempan, sea persona cu 40/ 30 of menos cu esey tin complicacion caba. “E edad ta baha drasticamente.”

Tin un lista di espera cu ta existi pa transplante, den caso cu si un famia mes por duna nan riñon na su ser keri, den caso asina e ta bay mas lihe. Sneek ta bisa cu e proceso si ta dura largo. “Mester haci test aki na Aruba pa asina por bay Hulanda. E proceso si ta dura largo, pero tin cu tene na cuenta cu e persona cu ta bay duna e organo, henter su bida ta cambia, pa motibo e persona ta dicidi of habri porta di bira malo/ mesun riesgo cu e pashent.”

Despues cu e persona ta haci test, e tin cu keda cuida su mes. Tin cu test si e organo en berdad ta bon. Agregando cu no kiermen nada si e pashent nunca tin dolor, pero e riñon mes su funcion ta na 20%. Segun Sneek, si tur cos ta match, e ora ta bay wak con lihe por bay Hulanda pa haci e operacion. “Den algun caso e pashent su curpa por stoot af e riñon. E organo ta bon, pero curpa no ta tum’e. No tin un 100% di garantia.”

Sneek ta keda bisa pa hende ta saludabel y bebe nan awa. “Nos meta y mensahe ta e cuido di bo riñon, purba di tur dia haci algo diario pa bo mes y bebe awa. No juice, koffie, te solamente, awa.”

E ta bisa cu den e cultura di Aruba no ta bebe mucho awa. E efecto cu e ta bin cune no ta wak e di biaha, pero na un edad mas avansa. Pa e motibo aki ta importante pa duna mucha for di trempan hopi awa y siña e mucha.

“Un riñon afecta no ta drecha mas. No warda te ora ta laat. E organo no ta duna señal prome cu esey. Un pashent por tin 5% menos di funcion renal, pero e no sa. Pues e ta fastioso pa motibo cu e ta keda deteriora y no ta drecha”, Sneek ta remarca. Pa finalisa el a bisa cu e malesa di riñon por bin den cualkier edad, ‘e no ta discrimina’.