Problema di fila largo pa paga sin solucion

Recientemente e directora responsabel pa Servicio di Impuesto aparentemente a gana e titulo interno di ‘Most Outstanding Manager’ di e ministerio. Esaki segun informacion for di seno di e propio servicio gubernamental. No cu esey a yuda pa mehora servicio na publico, cu ta parce cu cada aña ta bira pio. E transicion di number nobo cada aña – un desperdicio irasonabel di aluminio – pa uzo di sticker tabata mustra manera un adelanto bon pensa. Al fin y al cabo, e rumannan na Curaçao, di cual nos no gusta admiti cu nan tin bon idea, tin añanan ta implementa e metodo aki.

A resulta cu finalmente awor cu ta nos mes ta e ineptonan cu ni esey nos no por maneha? Nos ta bisa ‘nos’ aunke nos ta referi na ‘nan’. Si e departamento, y e ministro responsabel, di berdad ta pone servicio na publico na prome luga, mester ta imposibel pa e cos aki bay asina? Nos a tende tambe e critica riba e ciudadano cu nan no mester warda te ultimo ora pa nan bin paga. Naturalmente cu e ciudadano mes tin un responsabilidad den esaki, pero kico a pasa cu e alternativa? Hopi di nos ta custumbra pa añanan caba cu ta via banco nos ta paga e asuntonan aki.

Loke bo ta haci ta warda algun dia y bo ta presenta cu bo comprobante di pago y bo prueba di seguro y bo ta haya bo number (anteriormente) y awor bo sticker. Pero kico ta e problema actualmente? Parce cu e señor o señora cu ta administra e pagonan cu ta bin via banco a bay ‘AO’ y awor tur pago ta pega. Un redactor di e medio aki mes a paga varios auto dia 27 di januari y ayera, dia 14 di februari, mester a haya di tende cu e pagonan aki no ta procesa ainda y e no por haya e stickernan.

Pero, Servicio di Impuesto tin centenares di funcionario? Ora cos ta preta nan sa haci uzo di empleado temporal via uitzendbureau, ademas? Kico a stroba nan pa den e caso aki percura cu cos ta move pa esunnan cu no ta bin haci fila dilanti e departamento? Pero no, aparentemente pa ineptitud di e dirigencia di e departamento no ta ni contempla posibel solucion cu por alivia e situacion pa ciudadano y empleado publico. Pa colmo, a introduci un ridiculez completo den forma di un control gubernamental na banco. Esunnan cu bay paga na banco mester proba dilanti un empleado di sector priva cu nan tin nan seguro paga. Ma bon, ta den ki mundo nos ta bibando, unda sector priva ta haci trabao pa gobierno? Ta ken a bay di acuerdo cu semehante idiotes? Kico ta e balor di proba un empleado di banco cu bo tin bo asuntonan cu no ta nan asunto, bon regla? E argumento cu e cliente di banco ta haya di tende ta cu si bo no tin bo seguro paga, Servicio di Impuesto no ta acepta e pago.

Con nan no ta acepta, si banco paga nan, e ta riba nan cuenta caba, toch? Nos a yega di tende cu nan a manda placa bek pa un ciudadano pasobra su seguro no ta paga? No ta asina cu ora e ciudadano bay Servicio di Impuesto pa tuma su sticker, e mester proba dilanti di un funcionario publico atrobe cu el a paga su seguro. Den e caso aki e control ta tuma luga unda e mester tuma luga, nada en contra di esey. Pero esey ta haci e ‘control’ na banco algo totalmente obsoleto? Aki no ta solamente critica mester bay pa dirigencia di e servicio gubernamental, pero tambe pa e banconan cu ta acepta di haci trabao inutil pa gobierno. E banconan a caba di pasa den reorganisacion interno cu a costa varios empleado nan puesto. Anto awor gratuitamente ta bay haci trabao, inutil ademas, pa gobierno?

Y pa colmo den henter e chasco aki: que hubo di esunnan cu a paga ‘online’? Banco ta tramita nan pago sin mas, toch? Anto unda e control di seguro ta tuma luga anto? Na Servicio di Impuesto, unda e ta pertenece na prome luga! Y banda di tur esaki e asunto aki tin otro aspecto. Manera custumber na fin di aña y sin anuncia esaki na un manera drechi a introduci e cambionan den ley pa loke ta posibilidad di pago. E chauffeurnan di transporte pisa a organisa nan protesta y a haya un solucion parcial. Pero ta parce cu nos hendenan ta demasiado trankilo y ‘relaxed’. Kico cu pasa nan ta mantene calma, loke di un banda ta di aprecia y sigur nos no ta kere den disturbio, ni mishi cu propiedad publico o priva. Pero talbes nos mester pensa riba un acto di desobediencia colectivo, kedando masalmente sin paga nada te na mita di aña.

Por ta cu e ora si nos por a haya atencion di e ministro concerni. Unda el a keda den tur e asunto aki? Ahh, e ta deal solamente cu e parti di haya placa; servicio na publico no ta su asunto?