Den noticia local a aparece e asunto di un di e hotelnan grandi cu ta enfrentando problema serio cu escasez di personal, pa cual a acerca e ministro encarga cu labor pa asistencia.

Aparentemente e empresa no ta hayando suficiente persona local pa solicita riba e funcionnan cu nan tin habri.

Esaki a hiba na envolvimento di Departamento di Progreso Laboral (DPL), pa yuda interesa persona local pa bay solicita. Si acaso ainda no por resolve e problema, anto e empresa lo mester contempla e opcion di emplea hende di exterior cu mester di permiso di residencia. Aunke esaki ta representa un problema serio pa e compania, pa cual mester busca un solucion, esaki no ta un problema so den economia. Tin problema serio en general den por ehemplo e categoria di funcion halto cu ta menaza stanca operacion di varios empresa. Pa mas conveniencia e asunto ey ta den un articulo separa di e edicion aki. Aki atencion pa e sector di empleo di menos scol y pago den sector turistico principalmente.

Ta referi local na contratista

Entre esnan cu ta solicita pa trabao, entre otro riba referencia di DPL, ta topa cu e situacion unda no ta un hotel, por ehemplo, ta tuma nan na trabao, sino un contratista, cu of sin permiso di uitzendbureau, cu ta contrata nan pa tempo no defini, loke por implica cu despues di dos dia of un siman, nan ta para pafor sin trabao atrobe. Esaki sigur ta un punto cu mester clarificacion tambe di banda di autoridadnan, pasobra no por ta cu un ciudadano di e pais aki mester acepta trabao temporal sin ningun garantia, mientras cu tur stranhero pa ley ta haya un contrato pa un aña. Esaki ta un di e requisitonan di un permiso di residencia.

Redaccion di Bon Dia Aruba a papia cu varios persona cu a acudi na cierto hotelnan, cu nan no kier menciona, entre nan persona referi pa DPL, pa bin haya sa cu no tin contrato cu e hotel mes, sino cu un di e contratistanan cu ta opera eynan, cu of sin permiso di uitzendbureau, cu ta tuma nan na servicio temporalmente. Hasta tabatin caso unda ta bisa nan tambe cu e promer tempo lo no tin pago oficial, y por lo tanto nada di payslip, y tampoco nada di paga loonbelasting y prima di seguro social. Como hustificacion ta bisa nan cu “cos ta frega ainda, asina ta no por paga mas”.

Den e asunto aki ta parce importante referi na e situacion na maart 2020, tempo cu Aruba a bay den lockdown y hopi hende cu tabata traha, registra of no, den sector turistico cu contratista, a perde nan trabao di un dia pa otro, sin ningun beneficio ni apoyo. Den entrevista cu presidente di FTA sr. Hubert Dirksz, e tempo ey, riba pregunta di Bon Dia Aruba, el a declara cu por ta trata di sigur 1500 persona cu a bay cas.

E pregunta ta si awor aki cu e hotelnan a cuminza opera atrobe, a bolbe na e practica di e fenomeno di personal no emplea segun ley, sea cu contrato pero sin registracion oficial na e.o. SVb y Impuesto, sea totalmente informal y hasta ilegal, den caso di persona cu no ta legalmente na e pais. Hasta den e caso cu un persona stranhero tin un permiso di residencia, e ta mara na un cierto empresa y e no por usa esaki, y e empresa tampoco, como base pa bisa cu e ta traha legalmente cu sea e hotel of e contratista.

Ta di spera cu e autoridadnan concerni, tanto den atende persona buscando trabao, como esnan den supervision di situacion di cumplimento cu ley laboral, cuminza mira e problemanan actual den tur nan dimension. Recuperacion di economia ta depende di tin hende adecua na tur puesto, sea local (preferible) o di exterior, pero den un cuadro ordena, loke no ta e situacion actualmente.