Ayera mainta varios departamento a bay Barcadera, pa motibo cu a drenta un melding di varios dia, unda cu tin un tereno cu cantidad di sushi acumula a crea molester pa esunnan cu ta pasa cerca.
Robby Rossel di Bureau City Inspector hunto cu DOW, DIP y tur departamento concerni, a informa tocante e situacion. Rossel ta bisa cu for di basta tempo ta trahando riba dje, ya cu BCI ta haya melding di trahado cu ta traha cerca, hende cu ta cana rond y ta keha di musca y sangura.
El a bisa cu a bin controla e parti, y cu ta trahando ‘constantemente hunto cu Directie Natuur en Milieu’ (DNM) pa e parti di control, tambe di higiena, pa mira con pa maneha e situacion. Nan a haya sa cu e tereno ta un priva, pero nan lo mira con a traves di ley nan por yega na dje. Segun Rossel a bisa cu e tereno ta pertenece na APA, y lo bay delibera cu nan pa por yega na un solucion pa e situacion aki.
Pa locual ta trata e pikimento di sushi, te ainda no sa con ta bay tuma e luga y kico lo pasa cu e cantidad di material y articulo cu tin benta riba dje, manera bleki, corchon, plastic, unda lo deposita e desperdicio aki y con e lo tuma luga, mester por cana e caminda legal.
Rossel a bisa cu departamento di DNM ta trahando y haciendo esfuerso pa logra mantene e parti aki di Aruba limpi.
Richard Gibbs, di DNM, a bisa cu nan lo sinta cu DOW, DIP, DVG y esunnan cu ta conecta pa wmira con lo atende cu un situacion asina. Sinembargo e ta bisa cu locual a haci no ta castigabel, pasobra e tabata recycle material. Gibbs ta splica cu locual tabata pasa ta cu un persona tabata ricibi metal, papel, glas, y tabata separa esakinan pa manda na EcoTech; e bleki e tabata exporta.
Fan Eman di KoolTemp ta un di e personanan kende ta huur un pida tereno na Barcadera for di APA. Tin un otro meneer cu tambe ta huur, y esaki ta e persona cu a cuminsa haci e dump. El a bisa cu persona ta yega tira na e dump di e otro persona cu tin e otro pida tereno. “Bo no por soporta e cacalaca, muskita, sangura. E dump ta operando di manera ilegal. Nos a purba haci tur cos, negocia debidamente. E problema ta aumentando y causando molester grandi.”
