Por ta cu tin hende cu ta haya cu e consulta cu tur tipo di interesado cu epartidonan di e futuro coalicion ta teniendo, ta tuma hopi tempo y ta hasta un poco exagera. Tambe tin esnan cu ta sospecha cu e partidonan a yega na un acuerdo dia bieu caba, pero ta tene tur e consultanan aki pa e asunto aparenta mas serio, pa por bisa cu a tuma practicamente tur persona, organisacion y asunto na serio di antemano. Si ta berdad cu ta pa e motibo ey so nan lo ta hacie, esey ta lamntable. Pasobra por haci tur e esfuerzo aki tambe pa di berdad scucha tur posible ‘stakeholder’ y tuma loke nan tin di bisa na serio. Un cos si: lo bo haya bo – como futuro coalicion – cu un cantidad di interes contradictorio cu lo obliga bo busca solucion intermedio, cu tin ora ta laga un banda satisfecho y otro no, y den cierto caso ambos banda ta keda desapunta cu e ruta cu a scoge. Pero esey yama goberna.

Manera, por ehemplo, e asunto di e refineria. Bo por scoge pa kier habrie o pa desmantela e instalacion. Loke bo no por haci ta un solucion intermedio cu ta habri e asunto pa 50%, y desde e punto ey sigui cu…kico? Realmente nos no ta kere cu ta un opcion pa kier habrie, pasobra tin algo cu yama e realidad externo cu ta impedi esaki y cu mester tuma na cuenta. Tin un motibo pakico e ta para ta acumula frusto desde maart 2012, casi un decada pasa, y cu segun nos sano huicio ta bisa ‘call it quits’. Pero, den e caso aki, e coalicion ta scucha opinion y si ta scucha esnan cu ta boga pa e habri, que sea asi, pero puntra nan di biaha pa pone prueba riba mesa ta con nan tin pensa di haci esaki, y aki no tin lugar pa promesa vago, sin ningun base den e realidad di e mercado di e momento aki, pasobra esey tabata e wega pa 9 aña caba.

Y esaki mester conta pa tur cu ta bin trece plan pa proximo gobierno: cuminza cu puntra bo mes con factible e asunto ta cu bo ta bin trece como plan o solucion. Por ehemplo, si nos ta papia di solucion pa e problema di dump, mas en general nos problema con pa procesa y deshaci di e desperdicio cu nos ta produci conhuntamente, nos a mira bataya feroz durante e ultimo periodo di gobernacion, cu a mira dos ministro bandona cancha, cada un cu un motibo diferente y cu opinion diferente den e mesun asunto aki, pero te awe en todo caso no a surgi un solucion viable. Mientras tanto, e pulmonnan di e habitantenan den vecindario di e dump lo ta mas afecta cu di un humador di dos paki di cigaria pa dia pa 40 aña, y no tin nada cu ta parce remotamente un solucion duradero na caminda.

Pero banda di e ehemplonan menciona, tin decenas di otro mas, cu ta asunto cu ta pidi solucion di inmediato, cu un posible efecto positivo pa futuro. Nos tin tambe, banda di tur esaki, e asuntonan a largo plazo cu ta contempla den e metanan di desaroyo sostenible, cu tin relevancia directo pa e asuntonan menciona, como cu e solucion cu ta busca awor, lo mester cumpli cu e metanan cu pa aña 2030 lo tin un promer momento di medicion. Esey no ta e punto final di e trayecto pa e metanan di desaroyo sostenible, pasobra esey ta un proceso continuo, a base di un otro manera di pensa.

Aki caba nos lo mester bira un poco nervioso, pasobra despues di e periodo entrante di gobernacion y uno mas, ya nos den porta di 2030… Y si nos sa cu e proximo añanan, te na 2025 en todo caso, ta mas trabao di reparacion cu otro cos, unda lo no tin placa pa hopi cos cu lo ta ‘nice’ pa haci, anto mester ta hopi inventivo y creativo pa actua di tal manera den e proximo gobernacion aki, pa logra haci lo necesario di tal forma cu e ta beneficia e pais a largo plazo. Y beneficio a largo plazo ta solamente posible si tin cierto consenso entre e interesadonan, den ki direccion nos mester bay den proximo 30 – 50 aña. Por ehemplo: nos ta scoge pa cambia pa energia renovable? Si no bisa ‘Sí’ anto nos mester tin e certeza cu den e proximo añanan un gobierno ta cuminza cu algo y e siguiente ta sigui cune. Si ni e garantia ey e partidonan politico, specialmente e grandinan, no por duna nos, anto ta inutil pa hiba cualkier conversacion o consulta, tocante desaroyo duradero. Claro cu semper ta keda cierto espacio pa tuma otro opcion, basta cu ta dentro di e mesun linea di desaroyo. Por ehemplo, nos por discuti ampliamente tocante diferente opcion di energia renovable, basta tin un acuerdo den ki direccion nos ta bay. Pero loke no por ta pone den un acuerdo cu ta bay pa energia renovable, pa despues di cuatro aña yega na e conclusion cu nada a sucede, manera ta e caso awe. Ta recomendable pa esnan cu papia cu futuro gabinete, tin pa nan mes bon cla kico esaki ta encera.