Den un comunicado cu Fundacion Stimami Sterilisami a publica un siman pasa den cual a informa comunidad cu nan mester suspende nan actividadnan pa aña 2021, a wordo treci dilanti un biaha mas e problematica cu ta existi di cachonan y pushinan riba caya na Aruba.

Nan a splica cu nan a cuminsa cu nan actividad door di e idea di su fundado y CEO di un hotel reconoci na unda nan a haya financiamento pa por realisa nan actividadnan, hunto cu otro organisacion nan a logra sterilisa aproximadamente 26.397 cacho y pushi entre aña 2016 y 2021, aunke esaki ta un logro grandi, ainda e fundacion mester keda traha pa asina nan por logra nan mision di resolve e problema di sufrimento di cacho y pushi cu ta riba caya den e proximo 5 añanan.

Asina mes, nan a wordo treci dilanti cu nan mester pone mas esfuerso y cu esey ta necesario pa motibo cu nan ta sigui wak mas cacho y mas pushi riba caya, bandona y sin doño, e responsabilidad di cada doño pa loke ta trata mantencion y cuido di nan bestia na unda sterilisacion ta e metodo mas efectivo pa reduci e number di cacho y pushi.

Un pushi sin cu ta wordo sterilisa lo por haya 60 pushi baby den un aña y cacho lo por haya te cu 28 puppy, e decision aki lo deshaci e trabou duro cu e fundacion aki ta bin haciendo pa baha e cantidad di sufrimento experiencia door di tanto animal riba e isla.

Nan a informa cu desafortunadamente cu e donacionnan cu nan a haya di e doño y CEO di e hotel Ewal Biemans y un otro donacion di un banco reconoci no ta suficiente pa e fundacion por continua pa loke ta resta di aña 2021.

“Nos a sigui lo mas cu nos tabata por e aña aki y nos a busca tur manera pa recauda fondo, pero lastimamente e gastonan ta sigui, pero e fondonan no ta drenta,” Ewald Biemans ta splica. “Pa e rason aki nos a dicidi di suspende nos actividadnan te cu aña 2022 pa asina nos por purba recauda lo mas cu nos por durante e temporada aki.”

Asina mes nan a duna di conoce cu Fundacion Stimami Sterilisami ta un non-profit organisacion cu ta usa 100% di tur donacion pa ofrece subsidio parcial of completo pa e procedura di sterilisacion pa tanto publico en general, como tambe organisacionnan di boluntario cu ta cuida bestianan di cas of riba caya.

Aworaki e fundacion ta aceptando y buscando donacion pa su campaña di aña 2022 pa asina por sigui cu su mision pa resolve e problema di sufrimento di cacho y pushi riba caya den e proximo 5 añanan.

Tocante esaki, Bon Dia Aruba a tuma contacto cu Zoey Conijn di Fundacion Luna Foundation un di e fundacion cu ta yuda rescata bestianan cu ta riba caya ora cu nan tin espacio na su refugio y yuda esunnan cu tin mas necesidad, ademas di esey nan tin e obhetivo di siña y educa muchanan con pa trata cu bestianan.

Conscientisacion di muchanan pa loke tin di haber bestianan ta hopi importante, educacion ta e unico manera pa cambia loke ta pasando no solamente cu cachonan sino tambe cu pushinan y otro bestianan cu ta den estado di abandono.

Conijn a expresa cu e anuncio di fundacion Stimami Sterilisami ta algo cu ta afecta full Aruba, pero cu e ta compronde e decision di e fundacion cu no ta hayando apoyo di gobierno y cu e presidente di e fundacion no por keda hinca su mesun placa sterilisando e cachonan y e pushinan, “e no ta bay logra haciendo su so” el a sigura.

Cu e anuncio cu e fundacion a keda sin placa y sin fondonan Conijn a menciona cu esey ta nifica cu tin cu bay back na unda tur hende tin cu bay paga aproximadamente 300AWG cu ta e costo di cada sterilisacion, “fundacionnan no tin e placa ey, casi e hende ta paga 150AWG so, awor bo ta kere nan ta bay paga e 300 florin?” el a afirma.

Ademas di esaki, el a informa cu esey ta solamente e costo di operacion pa sterilisacion, ademas di esey tin otro gastonan por ehemplo, si e pushi of cacho tin complicacion tin cu paga extra, of si ta na estado, si no tin vacuna y ademas di esey cu tur veterinario a subi nan prijs un biaha mas, “nan no ta dunando un descuento pa alivia loke ta pasando”, Conijn a menciona.

Asina mes, tambe el a bisa cu door di e decision aki di fundacion Stimami Sterilisami e problema di bestianan riba caya ta bay bira pio, “nos ta bay wak mas puppies, ora nan a para un par di luna e aña pasa, esey a causa un aumento na unda tur caminda tabatin cacho y pushinan”, Conijn a comenta.

El a declara cu nan ta hayando hopi yamada di hendenan y cu awor cu nan a ripara cu e fundacion a stop di sterilisa e bestianan, awor hopi yamada ta drenta pa por sterilisa nan bestianan, pa loke Conijn a contesta cu tampoco nan como Luna Foundation por yuda pa motibo cu nan no tin e placa ey, fundacionnan tin cu recauda fondonan pa por opera un par, “300 florin y algo no ta wega, ta dificil y esaki ta algo cu pa nos cachonan, nos pushinan, nos mascotanan riba nos isla e ta un perdida di Stimami Sterilisami”, el a finalisa.

Sterilisacion ta un manera pa por yuda cu pa cada aña miyones di cacho y pushi no lo wordo someti na eutanasia of nan lo sufri riba caya bandona. Esey ta e resultado ora nan ta haya nan puppies y pushi di un manera no planifica cu por a wordo preveni si nan lo a wordo sterilisa.

Ademas di esey, tambe a keda conoci for di algun simannan pasa cu Bureau City Inspector ta bay traha cu Centro di Control di Cacho y conhuntamente cu KPA pa loke ta trata e implementacion di ley di cacho.

E problematica na Aruba pa loke ta tin di haber cu bestianan bandona riba caya ta hopi preocupante, no solamente door di e decision di Fundacion di Stimami Sterilisami sino tambe cu bestianan cu ta bandona riba e cayanan, cu no tin doño y cu seguramente manera Luna Foundation a menciona caba, situacion aki lo bay bira pio.