Stichting Adopt An Addict ta un fundacion cu a wordo lanta 9 aña pasa como parti di e solucion pa atende cu e problema di adictonan riba caya. Audrey Croes-Lacle kende ta presidi e fundacion aki acompaña cu e vice presidente di e fundacion, Frank Tieleman y demas miembro di e board a bisa cu e problema aki no a mengua ainda.

“Bo ta haya hopi cara jong ultimamente riba caya. E ta subiendo masha hopi mes.” E ta kere cu e problema aki no ta sinta den e mucha of hoben, pero den e cas of hogar unda nan ta wordo lanta, y specificamente e mayornan. Tin mayor cu no ta asumi debidamente nan responsabilidad di lanta nan yiu cu structura, bon ehempel y educacion. E prome responsabilidad ta cay cerca e mayornan cu mester tin tempo y dedicacion pa nan yiu, segun sra. Croes-Lacle.

Tambe el a referi riba e topico di legalisacion di uzo di cannabis na Aruba, maneho di adiccion, hendenan cu problema di adiccion y problema mental y falta di fondo di e fundacion aki.

No cannabis pa uzo recreacional
E mes ta kere cu uzo di cannabis como remedi ta fantastico ya cu su uzo ta treciendo un revolucion den henter mundo. Pero di otro banda, marihuana pa uzo recreacional , e no ta kere cu nos comunidad ta cla pe.

Mirando nan experiencia y contribucion pa atende cu e problema di adicto cayehero den nos comunidad, nan ta haya cu ainda ta falta un maneho solido y coherente di parti di gobierno rond di henter asunto aki. Cada cambio di gobernacion tambe ta trece cambio riba e maneho di adiccion. El a bisa cu durante e ultimo añanan nan a yega di firma masha hopi memorandum of understanding (MoU) y acuerdonan, pero nunca nada a pasa. E ta haya cu e problema grandi ta ego, ya cu a pesar cu nan ta firma acuerdo cu otro instancianan, nunca nan ta yega na otro. “Semper tin manera un competencia ken ta haci miho.”

E ta contento cu e trabou cu a wordo haci pa haci nos isla cinco strea locual gobierno a percura durante e ultimo añanan pa mehora nos infrastructura y embeyece nos isla. Pero e ta haya cu e hende mester keda central. “Si nos no ta educa nos hendenan den nos enseñansa, nos deporte, si tur hende pone su granito eynan, cos no ta anda manera e ta.”

Hendenan cu dobel problema
Otro punto di nan preocupacion ta cu recientemente a sali den corant cu PAAZ lo bira un fundacion. E ta haya cu nunca tabatin luga pa atende e problema dobel di e adicto cu problema psikiatrico of mental.

El a splica cu Cas Speransa cu ta e habitat cu e fundacion aki tin pa re socialisa e adictonan rehabilita cu a bini fei Santo Domingo, tin permanente varios persona cu e dobel problema aki. E informacion cu e fundacion aki a ricibi ta cu aki dos pa tres aña lo tin den PAAZ cu seccion pa e hendenan cu e dobel problema aki.

E fundacion ta consciente cu a yega di sosode episodio lamentabel cu e tipo di persona aki. Nan ta considera importante pa atende cu e problema aki debidamente. “Nos ta haciendo un trabou cu no ta nos rango”, segun sra. Croes-Lacle. Actualmente nan tin cuater cliente cu tin e dobel problema aki di adiccion y mental cu ta bibando permanente cerca nan.

A pesar cu e fundacion aki ta brinda nan tur ayudo, pero si algo ta bay fout tin biaha nan ta bay PAAZ pa corto tempo. Pero si nan no ta tuma nan bek den Cas Speransa nan ta bay bek riba caya. Esaki ta e preocupacion cu nan tin, ya cu Cas Speransa no tin un luga special pa e hendenan cu tin e dobel problema aki. Nan ta bogando hopi pa logra haya e cas di FCCA cu ta Cas Speransa na Moko 28. Nan a manda nan ultimo carta, pero nan mester sosten di nos comunidad y di gobierno. Despues cu nan a yega di paga hopi aña di huur na FCCA, nan ta pidiendo e cas aki pa nan por sigui traha mas profesional.

Aki dos pa tres aña lo bin e ayudo pa e dobel problematica, pero e ta ainda hopi leu. Un biaha mas nan a papia cu PAAZ pa purba haya e yudansa aki. Specialmente pa un di nan cliente cu ta den problema mas serio, pero te ainda e fundacion no a logra. Mientras cu e otronan clientenan cu no ta residente di Cas Speransa tambe ta hayando terapia ambulante dos biaha pa siman.

Falta di fondo
A pesar di tur trabou cu nan a yega di pasa den dje como fundacion, specialmente luchando pa nan fondonan, nan mester keda un institucion cu no ta liga na politica ni gobernacion. Sra. Croes-Lacle su opinion personal ta cu e fundacion aki no kier bira un partner cu ta asocia cu e gobernacion, ‘pasobra bo ta haya bo den un esfera politico’.

Nan ta dispuesto di haya yudansa den cierto momento di gobierno, pero nan mester keda un fundacion independiente. Nan ta kere cu e contribucion financiero di gobierno mester ta mas grandi pa asina e fundacion aki por sigui duna su contribucion contra e problema di adiccion den nos comunidad. Pero no solamente nan fundacion sino e otro fundacionnan cu ta haciendo hopi pa nos comunidad. Mayoria di nan ta hendenan boluntario cu kier yuda y pa nan no tin orario pa atende cu un emergencia of necesidad. Nan no tin un orario di ambtenaar di 8 ora so. P’esey e ta kere cu un funcionario publico no por cu e tipo di trabou aki aunke por ta nan ta profesional.

Na bispo di nan prome decada di existencia na aña 2018, e directiva di e fundacion aki a haci un presentacion di e trabou cu nan ta desplegando pa atende cu e situacion di e adictonan. Sra. Croes-Lacle a bisa cu e trabou cu nan ta haci no ta uno facil, y mester di sosten di comunidad. Nan no por bin cu un recaudacion di fondo unda tin consumo di alcohol ‘pasobra esey tambe ta un droga cu ta permisibel den nos comunidad pa hopi aña caba’.

Nan a bin cu un rifa pa recauda fondo cu ta na benta caba, ya cu nan gastonan ta grandi y nan entradanan no ta suficiente. Tambe den e rifa nan ta presenta un resumen di e trabou cu nan ta bin realisando, entre otro e hendenan cu nan ta manda afo pa ricibi tratamento na Republica Dominicana.

Na 2009 ora cu a cera e shelter situa den edificio di ex hotel Central, nan tabata e fundacion cu a saca 97 hende cu problema di adiccion y manda nan pa Hogares Crea na Santo Domingo pa un minimo di 24 luna di rehabilitacion .

El a splica cu e ayudo cu departamento di Asuntonan Social ta duna ta pa e personanan cu ta bay afo, pero no pa Cas Speransa cu ta e habitat pa re socialisa e adictonan recupera cu a bin fei Santo Domingo. “Cas Speransa no tabatin nunca niun subsidio di parti di gobierno.”