Ayera mainta Aeropuerto Internacional Reina Beatrix su operacion a wordo afecta seriamente na momento cu a encontra problema cu e sistema di airco. A traves di nan pagina di Facebook nan a anuncia cu debi na problemanan tecnico imprevisto cu nan sistema di airco, nan mester stop temporalmente tur procesamento di pasaheronan.

“Pa motibo di seguridad y comodidad, nos ta pidi tur pasahero cu ainda no a yega airport pa nan abstene di bin airport na e momentonan aki. Nos ta monitor e situacion di cerca y nos lo proporciona actualisacionnan asina cu tin mas informacion disponibel,” e publicacion a sigui indica.

E prome actualisacion a yega pa 10:40 di mainta cu a indica cu airport lo ta cera pa aproximadamente tres ora pa motibo di e problema tecnico cu nan sistema di airco. E clausura aki a afecta tur vuelo, esunnan saliendo di Aruba como esunnan yegando Aruba tambe.

Pa 1:05 di atardi e di dos actualisacion riba nan pagina di Facebook a indica cu e problema tecnico ta persisti pa otro seis ora y cu e aeropuerto lo ta cera te cu 7:30 di anochi.

E di tres actualisacion a yega 2:15 di atardi den cual e aeropuerto a splica cu un ruptura den e tuberia di e enfriador principal ta loke a causa e problema grandi aki. E tempo stipula cu a indica cu lo dura pa soluciona e problema tabata di cinco pa shete ora.

Esaki a causa un ola di reaccion di parti di turistanan cu a expresa nan frustracion y disgusto. Hopi tabata puntra kico ta bay haci pa loke ta trata nan acomodacionnan den e caso di vuelonan cancela of pakico mester stop tur operacion di e aeropuerto pa esaki.

Hopi ta haya e inconveniente aki inaceptabel y ta cuestiona pakico no tin un plan di emergencia na luga pa ora cu casonan asina sucede.

E ultimo actualisacion cu e aeropuerto a publica ariba nan pagina di Facebook a indica cu e aeropuerto lo keda cera te cu awe 7or di mainta. Durante conferencia di prensa ayera atardi nan a indica cu e aeropuerto lo asumi e costonan di alohamento y di e reservacionnan nobo di vuelonan di e pasaheronan a traves di cada aerolinea. Tambe a provee mas detaye tocante e decision pa cera e aeropuerto.

Segun e voceronan, e aeropuerto a dicidi pa cera su porta pa resto di dia debi principalmente na e falta di suficiente acomodacion y seguridad pa pasaheronan. A enfatisa cu e entrada di mas pasahero for di afo lo pone demasiado presion riba hotelnan y airbnb, cual ya caba mester a traha luga pa alrededor di 4,000 acomodadornan inespera cu a keda pega na Aruba.

Tambe a duna splicacion di e fayo tecnico cu a causa e interupcion grandi den operacion. Manera a menciona, e tuberia di e enfriador principal boa tera a kibra, cual a causa calentamento den e terminals y e sistema di BMS (building managing system) di e aeropuerto a cuminsa presenta erornan. Como resultado, esaki a presenta un problema pa seguridad di pasaheronan, como cu e vloernan por bira muha debi na condensacion.

E aeropuerto a enfatisa cu debi na e strobacion, solamente ocho pa nuebe vuelo so a bula, lagando atras e aproximadamente 30 vuelo restante. Como resultado, awe aeropuerto lo ta mas druk ainda, acomodando e 4,000 pasahero cu a perde nan vuelo, ademas di aproximadamente 5,000 mas cu a plania pa bula awe.

Esaki no ta prome biaha e aña aki cu e aeropuerto ta encontra e tipo di problema aki. Den luna di januari caba tabatin un problema similar locual a afecta e operacionnan di e aeropuerto drasticamente.