Problema den enseñanza…Resolve, dunando claridad…

Nos ministro nobo di enseñanza a haya di biaha varios asunto pa atende, cu a haya bastante atencion den prensa, pero cu ta indica tambe e problemanan mas profundo cu pa añanan largo ta afecta e sector aki. Un caso ta tocante e kiebra di e contrato cu Hospital tin cu EPI, cu ta concerni e contenido di e educacion cu e enfermeronan ta haya na EPI. Sin bay den detaye ken tin razon cu nan argumentonan, ta obvio cu pa basta tempo caba tabatin comunicacion andando tocante e necesidad di mehoracion di e contenido di e curriculum cu e scol ta ofrece. Di parti di e scol no ta desmenti esaki tampoco, loke por a lesa den e entrevista cu e director di e institucion den nos edicion di ayera, pero ta trece dilanti nan capacidad limita pa implementa cambio den loke e scol ta ofrece, pasobra cambio ta implica inversion, y esaki ta unda e barco ta pega… Segun su relato, e scol ta keda cada aña cu un parti di su gastonan cu no ta cubri y cu mester soluciona cu gobierno despues. Y si e gastonan fiho ta come henter e presupuesto, y mas, anto ta logico cu no por inverti den innovacion, pa mas necesario cu esaki por ta.Algo lamentablemente comun den henter enseñanza.

Constata esaki ta implica di biaha cu nos no ta yega na solucion di e problema aki simplemente si dicidi cu tal o cual partido den esaki tin mas o menos razon, pasobra nos ta topa aki cu un problema structural, no solamente den enseñanza, sino den henter gobernacion. Un parti demasiado grandi, den gobernacion en geenral, no enseñnza, ta bay na paga payroll y no tin nunca suficiente recurso pa inverti den mantene e organisacion operativo na un nivel aceptable, incluyendo e inversion den cambio pa ta prepara pa futuro previsible. No ta pornada cu frecuentemente den e Editorial aki ta mustra riba e problema cu gobernacion riba un sinfín di tereno ta carece di planificacion, y ta limita accion na percura pa e organisacion actual ta ‘canando’. Y naturalmente ta yega na un momento cu esey no ta posible mas y cu mester haci algo, y cu urgencia. Ta parce cu den e caso aki EPI a dal ‘rockbottom’ y algo lo mester sucede pa logra e cambionan necesario. Ta inimaginable cu no lo percura pa Aruba tin su propio preparacion educativo pa enfermeria, y esaki ta loke awor ta riba mesa di e mandatario nobo pa busca un salida. E salida ey ta bastante simple: lo mester bin mas placa pa inverti.

Problema ta cu no ta pornada nos ta den crisis. Pa hopi aña caba procesonan di innovacion den enseñanza no tabata tuma lugar, y e caso aki ta solamente un di nan. Ademas, e por ta un di e casonan mas facil pa resolve, aunke esaki ta parce contradictorio na e momento aki. E motibo pa bisa esaki ta cu den e caso aki tin bastante claridad kico lo mester sucede, den cual direccion e mehoracion mester bay, di manera cu no ta trata di un conflicto di profundo diferencia di opinion den ki direccion lo mester evoluciona. Den e sentido aki e problemanan den otro sectornan di enseñanzata mustra gigantesco. Como ehemplo por sirbi enseñanza basico, cu pa decadas ta hinca cu un ptroblema di calidad, cu a haya opinion di tur banda caba ta kico lo mester sucede pa nos por haya mihor calidad tambe den e diferente formanan di enseñanza secundario. Aki, fuera di e problema cronico, pa tur, di falta di recurso, tin tambe e interogante ta kico realmente nos ta bay haci. Den ultimo añanan nos a mira un sinnumero di problema a pasa nos dilanti, tambe causa pa e pandemia, pero e problema fundamental di enseñanza basico no a ser toca. Nos por a observa cu den e promer encuentronan cu e ministro nobo tabatin cu e otro actornan principal di e sector, e tema aki no a bin dilanti, y nos por a tuma nota di e preocupacion pa pago di salario y otro asunto cu tin di haci cu ‘rechtspositie’, importante sin duda, pero esakinan no ta e cosnan strategico cu mester bay logra den e proximo cuatro aña.

Mester bisa si cu tin trabao preparativo ta sucediendo for di vista di publico, como parti di e acuerdo cu Hulanda pa mehoracion den e sector aki. Ta parce nos logico cu na e altura aki no ta sali ainda den publico cu anuncio kico ta bay haci, pero ta di spera si cu porfin lo por cuminza anuncia ‘decision’ unda ta bay, pa tera o pa lama, pasobra esey ta haci hopi falta. E tema di e lugar di Papiamento den enseñanza ta solamente un di e aspectonan. Di e periodo cu a termina recientemente nos a hereda por ehemplo e decision ministerial, practicamente via decreto, cu nos no conoce ‘keda sinta’ mas, sin cu realmente tin claridad riba e consecuencianan cu esaki tin; un ehemplo di decision ad hoc cu no ta contesta e preguntanan strategico nos dilanti.

E mandatario encarga lo ta bay tin tempo dificil su dilanti. Futuro di e sector ta pidi solucion, y e solucion ta den duna claridad, loke no semper lo ta na agrado di esnan envolvi. Banda di salario… tin demasiado otro cos pa discuti.