E siman aki finalmente a yega un desenlace momentaneo den e conflicto cu ta nadando varios aña caba entre gobierno y e fundacion catolico SKOA, responsable pa gran parti di e scolnan na Aruba. E resultado ta cu lo bin un aumento drastico di loke mayor di mucha na e scolnan aki mester bay paga como contribucion anual pa nan yiunan. Esaki inmediatamente ta lanta otro horcan di critica, cu riba su mes por ta hustifica pero no ta yuda clarifica e asunto. Pesey ta necesario pa bolbe na pasado, pero no di e manera cu e partidonan den e conflicto a presenta esaki.
Nos lo cuminza nos pensamento cu e pregunta: ta normal cu un persona, cu ta traha pa un organizacion cu ta haya subsidio, ta haya e oportunidad pa bira ‘ambtenaar’ o igual na ambtenaar? E contesta general ta: “No”. Bo no ta y no ta bira un empleado publico pasobra bo empleador no ta Pais Aruba. Bo empleador ta un otro entidad legal cu por bien ricibi subsidio di Pais Aruba, pero esey no ta haci su empleadonan ambtenaar ni igual na ambtenaar.
E siguiente e ora ta: “Y pakico den pasado nos a mira varios caso, no solamente na e fundacion menciona, caso di personal cu a haya acceso na pago via gobierno, cu hasta evaluacion di nan funcion cu formulario oficial di funcion (FIF) y pago haci na e entidad segun rango y schaal di gobierno? Nos lo no haya un contesta oficial nunca, y pesey nos mes lo duna e contesta: pasobra esaki tabata e anomalianan cu tabata tuma lugar den gobernacion, di ambos partido grandi, cu nunca mester a permiti! Mester a mantene estrictamente e separacion entre empleado publico y empleado di sector subsidia.
Awor, pa bolbe na e caso grandi den enseñanza subsidia: tabata un eror garafal cu a permiti sikiera inicia e discusion tocante e posicion di e werksternan di SKOA. Aki ambos parti, tanto e fundacion como gobierno – di cualkier color – ta carga culpa, pasobra na ambos banda lo mester tabatin presente e sano hucio pa no bay den e rumbo aki. E separacion permanente entre empleado publico y trahador di un entidad priva subsidia no necesariamente mester conduci na un trato fundamentalmente diferente, den e sentido cu e subsidio gubernamental mester ta suficiente pa cubri e gastonan di e sector subsidia, na un manera sano y equilibra. E problema a surgi na momento cu a bin un ministro cu, bon argumenta, no tabata dispuesto pa reconoce e situacion inapropia cu el a hereda di su antecesornan. El a mustra e fundacion riba e problema cu e fundacion hunto cu e gobierno anterior a crea y no tabata dispuesto pa hala atras, mucho menos despues cu na dos ocasion el a haya razon den corte.
Sin embargo, despues a cuminza un wega politico cu su propio partner mayoritario, cu a ignora e punto di vista huridicamente corecto di nan partner menor den e coalicion, y probablemente lo a kere cu tabatin manera di saca probecho politico di e asunto, dunando e fundacion y e empleadonan un speranza, falso.
Awor, nos ta na 2023, y e mesun partido grandi ta den e coalicion nobo, y a ripara cu despues di tur e promesanan cu nan si ta bay regla e asunto, no tabata posible pa yega na cumpli cu promesa haci. Di un banda esaki ta bon, pasobra en todo caso no a continua e caminda equiboca cu gobierno anterior a cana dunando e fundacion speranza cu ta bay kibra maneho sano di gobernacion pa nan. Cu e decision tuma recientemente, e fundacion lo mester bay sinta riba e blaar cu nan mes a crea, y a opta pa tira e problema riba e mayornan di nan alumnonan. Con e pleito ey ta bay termina, no ta previsible ainda, pero realmente lo no tin mucho opcion pasobra tanto otro scol no tin, y ademas nan tur ta cobra un contribucion pa e gastonan extra cu nan tin.
Pero, henter e storia aki ta un aspecto di e problematica general di nos enseñanza. Nos ta na inicio di presencia, si tur cos bay bon, un cambio drastico den mehoracion di contenido di enseñanza. Sin embargo, nos no por cera nos wowo pa e realidad cu te awe nos pais ta lidia cu defecto y deficiencia grandi ainda den infrastructura pa nos enseñanza por funciona debidamente. No cu nada ta sucediendo, pero maneho no ta pa gaba cada biaha cu bo a drecha algo na un scol. Maneho ta ora bo tin un plan general di rehabilitacion completo, contemplando tur aspecto di mehoracion, y ta reporta periodicamente e avancenan. Esey mester inclui tambe e falta structural cu tin keto bay den e infrastructura pa educacion fisico, unda ta simplemente un tarea gubernamental pa garantiza trato igual pa tur scol, nada mas, nada menos.
Y ken mester paga e trato igual aki? Gobierno, for di e fondonan cu nos como comunidad ta aporta. Tuma por ehemplo e asunto di airco. Nos ta acepta como realidad cu tur scol mester airco? Si? Anto actua consecuentemente y percura pa tur scol haya e facilidad ey, nada di ‘aircogeld’. Nos tin mil y un problema pa atende den enseñanza, pa discuti cos cu bien por keda regla sin bira obheto di politica barata. E caso menciona aki, unda finalmente gobierno actual mester a reconoce cu e mandatario cu nan a core tabatin razon, ta mustra con ta perde tempo y placa cu confrontacion inutil, cu otro asunto mas importante pa atende.
