Problema den direccion di parke solar dilanti di AAA a causa interupcion di coriente

Mediante un comunicado ELMAR N.V ayera mainta a informa cu nan tabata confrontando un interupcion den servicio di coriente. E causa di e interupcion tabata un problema den direccion di e parke solar cu ta produci coriente cu ta situa dilanti AAA.

Nan tecniconan tabata den proceso di investigacion conhuntamente cu e propietario di e parke solar pa resolve e problema, manera a sigura.

Pa 12.15pm area di Wayaca, Santa Marta, Papilon, Jucuri, Mahuma y vecindario, nan a sigura cu nan sistema di comunicacion di grid a notifica cu tabatin un problema den e distribucion di coriente den e area aki y nan tecniconan tabata na e sitio atendiendo cu esaki.

Igualmente a señala cu pa 10.53am sistema di comunicacion di grid a notifica nan ti un otro problema den distribucion di coriente di e areanan di Hooiberg, Santa Cruz, Balashi, Pos Chikito, Savaneta Zuid y vecindario, tabata 11.49am cu suministro di coriente a ser estableci den tur area afecta maneranan nan sigura.

E efectonan di cambio di clima ta indudabel y como isla, ta presencia e cambionan aki na prome fila. E temperaturanan creciente no solamente ta afecta e bida diario, sino tambe ta pone un stress significante riba infrastructura di energia. E aumento rapido di consumo di coriente durante un heat wave tin su impacto riba e red di distribucion.

Interupcion di coriente ta un situacion fastioso cu henter comunidad di Aruba a bin enfrentando den ultimo luna, pa esaki durante conferencia di prensa di Gobierno di dia 4 di september ultimo, minister Croes a elabora riba e situacion actual cu tin, cu constantemente coriente ta bay den diferente barionan y mirando cu e situacion aki ta uno inaceptabel pa Gobierno, a pidi Utilites pa liderisa e proceso encaminando cu e companianan WEB, ELMAR un plan di accion den e proximo 30 dianan.

Minister Croes a indica cu comunidad di Aruba ta pagando un prijs considerabel pa awa y coriente y corectamente ta espera di por tin un calidad di suministro optimal. E suministro di coriente mester ta confiabel y stabiel, specialmente den e temponan aki cu ta hopi calor.

“Mester traha cu un maneho cu ta premira unda inversionnan mester wordo haci pa distribucion y suministro di coriente permanece stabiel tur caminda na Aruba. Calentamento global ta un fenomeno conoci y como pais nos mester ta prepara pa por confronta y enfrenta tur e retonan cu esaki ta trece cu ne,” e mandatario a splica.