No ta pasa un dia sin cu por lesa un cantidad di keho den medionan social riba e cancelacionnan sea retrasonan di oranan, hasta dia riba vuelonan di Insel.
Esaki ta trata specificamente riba e rutanan Aruba, Corsou, Boneiro y St. Maarten. Despues cu Tiara Air y Aruba Airlines a bula afo, Insel tin e monopolio riba e rutanan aki. Minister di Transporte Otmar Oduber a priminti un par di luna pasa (den un entrevista cu Bon Dia Aruba) cu lo hiba un combersacion serio cu e compania pa adres e problema di retrasonan. Y tambe riba e prijs exorbitante di ticket.
Pero te ainda no ta conoci kico e resultado di e combersacion aki ta y tampoco por mira un mehoracion den e servicio di e compania di aviacion.
Kehonan tambe tin di e pasaheronan cu no ta ricibi niun recompensa. Tin diferente discusion riba Facebook entre otro kico por haci. Bon Dia Aruba a puntra Luciano Maduro di Dienst Huur- en Consumentenzaken (DHC) si nan a haya keho di pasaheronan bulando cu Insel. E ta bisa cu te ainda ningun hende a duna keho relaciona cu algun mal contento of mal experiencia di biahe. E ta invita hende pa pasa cerca nan oficina na Wayaca of yama 5829914 pa cualkier keho si no un aerolinea no ta recompensa.
Kico bo por haci
E departamento a saca un relato 8 di augustus cu informacion relevante pa cancelacion di vuelo. Nos lo publica esaki un biaha mas como cu nos ta ripara cu hende ta indica cu nan no sa kico nan por haci:
Na Aruba no tin un ley apart cu ta regla derecho di pasahero den aviacion, manera ta e caso na Hulanda via ordenansa di derecho di consumido (EG) nr 261/ 2004. Pues e reglanan general di acuerdo nan lo ta valido, pero prome cu esaki lo conta kico ta regla den e acuerdo di biahe y tambe e condicion nan general, teniendo na cuenta cu esaki no mag di ta irasonabelmente pisa pa e pasahero (art. 6:231-247 BWA).
Ora un vuelo wordo cancela, den principio tin un falta den cumplimento di e acuerdo (incumplimento di contract; art. 6:74 BWA) y como cu cancelacion ta encera cu e acuerdo ta permanentemente imposibel, notificacion di incumplimento ta necesario. Pasahero lo tin derecho riba su placa bek door di terminacion di e acuerdo (art. 6:265 BWA) y indemnisacion di daño pa otro gastonan haci directamente relata y a consecuencia di e cancelacion di vuelo (art: 277 BWA).
Un excepcion riba esaki ta si e cancelacion di vuelo ta a consecuencia di circunstancianan extraordinario cu no por atribui na e aerolinea, por ehempel welga of clima extremo. Den e caso aki e aerolinea mester indemnisa solamente e beneficio cu ela gana y cu e no lo a gana si e vuelo lo a sigui manera acorda (enrikecimento inhusto art 6:78 combina cu 6:212 BWA).
Den e caso di Insel e directiva ya a expresa varios biaha den prensa cu nan tin problema cu nan vuelonan pa motibo di falta di piloto y mantencion di e avionnan. Bon Dia Aruba e ora ta conclui a base di e informacion di DHC, cu den casonan asina e pasaheronan tin derecho riba recompensa.
