E problema cu salario di un grupo grandi di trahadonan di SABA a keda resolvi. Esaki gobierno ta informa.
Den 3 aña cuminsando na 2018 nan lo ricibi pagonan pa coregi un situacion cu ya ta andando for di 2001. Awor minister di Salud Publico a firma e decretonan gubernamental pa cada un den e grupo pa asina nan haya e pagonan.
Segun e relato di ministerio di Salud, Cuido di Nos Grandidan y Deporte e proceso a cuminsa desde 2001. Un grupo grandi di empleadonan di casnan di cuido resortando bou di SABA a haya nan confronta cu diferencia den nan nivel di salario, locual a conduci na un estudio. “Lamentablemente e resultado di e estudio y ehecucion di e cambionan proponi a keda pega pa añanan largo na diferente departamento di gobierno”, segun e ministerio.
Ministerio di Salud Publico cu colaboracion di sindicato ABV, Departamento di Recursonan Humano di Gobierno (DRH) y directiva di SABA a yega na un proposicion. Nan a dicidi di reserva 3 miyon den presupuesto y lo paga e trahadonan e atraso den un periodo di 3 aña.
