Problema cu salario minimo atrobe… Ki dia ta siña?

Mientras cu ministro encarga cu labor tabata sinta na mesa cu e partnernan social den dialogo, a papia di tur cos menos salario minimo. Entrante 1 di mei a aumenta e salario minimo cu 3%, sin cu sikiera e organisacionnan concerni a haya oportunidad di duna nan opinion, segun nan.

Esey ta un aspecto di e asunto, si e ministro a informa o consulta e partnernan na un manera cu ta cuadra cu e bon ambiente y entendimento di e momento aki, cu ta brinda espacio pa un dialogo tri partite positivo. Pero lamentablemente atrobe tin mas punto di discordia, cu mayoritariamente tin nan raiz den e manera cu gobierno – e mandatario concerni – ta maneha e asunto.

Por ehemplo, e aumento actual ta a base di articulo 13, inciso 3 di e Ordenanza encuanto Salario Minimo, cu ta duna posibilidad di aumento a base di ‘circunstancia extraordinario’. Esaki ta diferente cu e posibilidad di aumenta salario minimo entrante 1 di januari, conforme articulo 13, inciso 1 y 2 di e ley, cu ta mara na aumento di Indice di Prijs di Consumo (CPI), cu ta basa riba e diferencia di e CPI na augustus di e aña anterior, y augustus di e aña den cual ta haci e calculo. A base di esaki tabata posible pa aumenta e salario minimo cu 5%, loke tabata e diferencia, principalmente influencia pa e aumento di BAZV y introduccion di BAVP. Sin embargo, no a haci uso di e posibilidad aki.

E motibo pa no haci esaki ta e discusion cu a surgi den ultimo añanan, unda ta argumenta cu e ‘Average Period Inflation’ ta duna un miho refleho di e inflacion cu e actual comparacion di e ‘End of Period Inflation’ basa riba comparacion di e CPI di ambos luna di augustus, manera e ley ta prescribi. Esey por tin argumento valido, pero e problema ta atrobe, cu si tur e partnernan ta di acuerdo, pakico anto no ta simplemente cambia e ley…? Awor nos ta haya nos cu argumento cu esaki a bira caba ‘bestuurspraktijk’ pues e mester ta OK. A proposito, segun e manera di calcula nobo aki lo por a aumenta e salario minimo cu 1,8%, loke tampoco a sucede.

E pregunta ta cu si ta esaki nos ta tuma como costumber pa nos manera cu anda cu ley. E ora anto nos no mester hiba nada mas parlamento; nos ta simplemente bisa cu e partnernan principal ta di acuerdo, pues nos ta introduci e practica nobo, sin mas. Si esaki ta e rumbo nobo, anto nos por warda e plannan pa mehora gobernacion y simplemente goberna, ni sikiera ‘pa decerto’ pero segun ‘consenso no formalisa’, pasobra… ay, e ley…, cualkier dia nos ta cambi’e!

Pero e storia no a caba aki. Gobierno a pidi SER aña pasa, simultaneamente, tambe un conseho a base di e articulo 13, inciso 3, encuanto circunstancia extraordinario. Aki SER a cumpli cu e peticion y a yega na un opinion mayoritario, cu e circunstancianan extraordinario, cu tin di haci cu e introduccion di BAVP y aumento di BAZV, y e perdida di poder di compra cu lo a resulta, lo hustifica un aumento di 3%. Tabatin un posicion minoritario contra esaki. A base di e opinion mayoritario aki e mandatario a implementa un aumento awor. Sin embargo, den su conseho Raad van Advies(RvA) a duna di conoce cu no tin un base pa aumento, ya cu e ‘circunstancianan extraordinario’, sea a haya compensacion di otro manera (aumento di ‘reparatietoeslag’), o no por califica como aumento di prima, pasobra e aumento di BAZV no ta aumento di prima, sino aumento di impuesto, cu ta conduci na aumento di prijs pa consumidor, inflacion, y mester a haya compensacion den e aumento via articulo 13, inciso 1 y 2 na januari, pero no a sucede. E ley den su Memorie van Toelichting ta referi en berdad na gasto adicional pa e empleado, manera aumento di prima, cu ta reduci e salario netto di e empleado, pero esey no ta al caso aki. Esaki tambe tabata e motibo pa Raad van Advies conclui den su conseho, cu realmente no tin un base aki pa maneha e formula di ‘circunstancia extraordinario’ y ta mantene otro opinion cu SER, unda un mayoria a bay di acuerdo cu conseha aumento di 3%.

Tin otro aspecto mas cu mester tuma na cuenta, y esey ta e circunstancianan economico, cu si of no ta forma un base razonable pa aumenta salario. Nos economia no ta pasando den su miho momentonan, a pesar cu e sector principal, turismo, ta andando bon. Un pronostico pa 2019 di 1% di GDP nominal no ta parce nos un base solido pa hustifica un aumento di 3%, ademas cu no ta conoci ainda con economia ta andando na e momento aki. Sikiera por a warda te cu e prome rapport financiero di 2019 duna un tiki claridad con e entradanan di gobierno, cu ta refleha situacion economico, por ta riba mesa. Dentro di apenas dos siman, desde awe, esey lo ta e caso.

Concluyendo, nos ta ripara atrobe cu ta haci mal trabao gubernamental, basa aparentemente, riba gana di ‘haci cos’ populista, sin debido evaluacion y ademas poniendo ley un banda.