Ainda e problema cu chauffeurnan di trucknan/contratistanan local tin den cuadro di e proyecto Watty Vos no ta resolve. Fin di siman un grupo lo reuni cu DOW pa garantisa cu no ta perde trabou pa via di e compania di construccion Mota Engil.
Esaki ta locual Dangui Oduber ta bisa ora nos a tuma contacto cu ne despues cu el a pone un mensahe riba su Facebook. “Alerta na tur doño di heavy equipment y nan trahadonan pa un reunion di urgencia”, asina e parlamentario di MEP a pone.
Sr. Oduber ta bisa cu e intencion di esaki ta cu Mota Engil a trece mas heavy equipment y cu asina contratistanan local lo sigui perde mas trabou. Minister Benny Sevinger di Infrastructura a priminti dialuna cu e compania aki lo coopera cu contratistanan local. Pero awor ta mustra cu e material ya a yega y asina afecta e contratistanan di Aruba, segun sr. Oduber locual e ta haya inaceptabel.
Segun e nan lo organisa un reunion y lo bin un accion mas pisa cu esun di diabierna pasa si gobierno no bin cu un solucion di berdad. Nan ta wardando ainda riba e posicion di gobierno, como cu nan a priminti di yega na un acuerdo cu e contratistanan local. Esaki DOW a informa tambe den un relato cu nos a publica e siman aki.
Sr. Oduber ta bisa cu pa fin di siman lo mester haya claridad. Pasobra cu e grupo lo a reuni cu DOW unda nan a wordo garantisa cu lo haya trabou pero ainda no tin niun contract.
