Problema chikito di awe…Y no grandi di mañan…?

Lamentablemente, e problema di siman pasa no a keda resolvi, y manera cos ta pinta awor, por lo pronto no tin solucion tampoco. Despues di scucha ayera e dos figuranan mas importante den e asunto awor, nos promer ministro y e ministro obheto di critica, cada un a duna nan punto di vista sin cu esaki ta duna mucho perspectiva pa sali di e impasse.

Si nos ta scucha e promer mandatario cu atencion, e no ta bay riba e tema di legitimidad si of no di e mocion cu a pasa diahuebs pasa, pa e no mester duna un opinion tocante e accionnan di su colega di partido, presidente di Staten. Esey ta parce un ‘move’ inteligente, pero ta haci si cu e mes ta cera e ruta anto di bay Gobernador cu un landsbesluit di retiro cu su firma ariba, pa busca esun di Gobernador. Si nos por tuma e caminda ey como cera, anto mester yega na conclusion tambe cu e no mester di bisa cu su presidente di Staten a faya, pero ta obvio cu ta asina, pasobra esey tabata e caminda cu lo a cana si e mocion a keda aproba na un manera legitimo. Pues, no tin nada ta bay Gobernador, por lo pronto.

Cu e conclusion ey nos no a keda cla, pasobra e impasse ta mes o mas grandi cu promer. E parlamentarionan cu a hunga un papel den e asalto politico aki, cu como bon tiro ‘a sali por la culata’ a cuminza pensa caba riba e siguiente manera pa boycotea e ministro. Loke nos ta tende ta cu no lo participa na ningun reunion di parlamento unda eministro en cuestion lo ta presente. Esey no ta parce nos un bon idea, pasobra cu esey nan ta tranca proceso importante pa e pais, pues no ta e ministro nan ta perhudica, sino e pais. Riba su mes nos no ta haya esey asina straño, pasobra nos tin basta tempo ta pensa cu e parlamento aki no tin nocion mas di kico ta interes general y kico no. Ta hustamente pa e motibo ey nos ta unda nos ta.

Pero tin algo mas cu ta hunga un papel den esaki, y esey ta cu e strobamento di trabao di parlamento lo toca nan propio gobierno di por termina por ehemplo e presupuesto complementario cu mester atende den e dianan aki. Y esey no ta importante riba su mes so, pero tambe pasobra si nos no ta ekiboca, nos ta keto bay bao di supervision financiero di Reino… pa mas dolor cu esaki ta causa na e gobierno aki. Esey ta implica cu banda di henter e paquete di asunto nobo cu Hulanda kier implementa, en todo caso nos tin e obligacionnan existente cu cual nos mester cumpli pa nos no haya nos den mas problema ainda. Y esaki no ta asunto facil. Di e total cu Aruba mester fia e aña aki ainda, te luna pasa a keda mas di Afl. 500 miyon pa financia, di cual gobierno mes ta bisa cu nan ta tira un promer vista den direccion di Hulanda. Si esey no logra, pasobra no ta yega na un acuerdo, lo mester busca esey riba mercado internacional, esaki segun gobierno den contesta riba e preguntanan di parlamento pa cu e presupuesto complementario aki. Esey naturalmente ta parce mas facil cu e ta, pasobra pa fia riba mercado internacional lo mester aprobacion di e mesun gobierno di Reino, cu cual gobierno di Aruba no tin acuerdo. Y ademas nos ta na BB-, junk status anto, loke ta implica cu fia mas di 500 miyon lo ta na un porcentahe di riba por lo menos 7 – 9%, algo otro cu un prestamo di Hulanda na un porcentahe hopi mas abao. Y no ta trata solamente di e hecho cu nos por spaar varios miyon pa aña na interes, ta bay tambe pa e perspectivanan economico pa e proximo añanan cu no ta di gaba. Nos a tuma nota den siman cu a pasa di e proyeccionnan di AAA N.V. pa e proximo añanan, cu ta mustra cu ta bay dura te despues di 2025 pa nos por ta back na e nivel pre-Covid.

Te e tempo ey nos economia lo rindi menos, loke lo tin consecuencia pa caha di gobierno tambe. Esaki lo tin consecuencia grandi pa empleodo di gobierno, pa infrastructura social y medico, pa enseñansa, etc. Simplemente bisa: e presupuesto di alrededor di Afl. 1.500 miyon cu tabatin promer cu Covid, nos lo no mira mas pa varios aña, pa un motibo clave: nos no por keda fia manera nos ta fia e aña aki. Segun calculacion di Banco Central, pa fin di e aña aki nos lo yega na 136% di GDP na debe, y di ey ta un ruta so tin: baha e cos ey! Ta absolutamente inimaginable cu den e proximo añanan nos por keda fia manera e aña aki, unda mas cu mitar di loke gobierno ta gasta, ta placa fia. Nos a yega ‘end of the line’ den fiamento, y nos mester traha cu loke nos tin. Esey ta e cosnan cu mester papia awor, envez di bringa cu otro pa e caprichonan personal di un par di mandatario. Nos mester keda contempla problema insignificante di awe, y no papia di e grandinan di mañan?