Probecha di oportunidad pa schaats na Palm Beach

Te cu dia 4 di januari comunidad tin oportunidad pa schaats na Palm Beach Plaza net banda di Taste of Belgium. Por haci esaki cuminsando for di 4or di atardi te cu 10or y mey anochi.

Den e temporada di fin di aña aki si bo ta buscando algo di haci cu famia specialmente mirando cu e muchanan tambe ta cu vakantie na cas, esaki ta un actividad ideal pa grandi y chikito participa na dje. Taste of Belgium a huur e pista pa schaats for di Purple Entertainment y ta costa 5 florin pa schaats 15 minuut pa grandi y chikito. Na momento cu Bon Dia Aruba a bishita e sitio anochi a tuma nota cu ta mayoria mucha chikito ta schaats. Zoraida Conijn – Berkel a splica cu berdad mas muchanan ta schaats y e mayornan ta sinta na banda den e area rond di e pista ta wak nan. “Muchanan chikito tin mas curashi y nan ta cay y lanta bek y sigui schaats y asina nan ta siña haci’e hopi lihe.”

Inicialmente hopi persona mas grandi specialmente no tin suficiente curashi di schaats na prome instante pa motibo cu kisas nunca a haci esaki y tin berguensa of miedo. Sinembargo e ta algo great pa purba algo nobo y por wanta full rond te ora cu ta mas comodo pa laga los y disfruta di e oportunidad pa schaats. Banda di esaki tin musica ta toca cu bo por purba baila y forma un coreografia mientras cu bo ta schaats y hasta weganan manera ice hockey ta wordo hunga.

E pista tin un capacidad di 20 persona cu por haci uzo di dje pareu, pues por bay cu gruponan di por ehempel trabou pa un actividad leuk prome cu aña caba. Por haci reservacion pa esaki parti mainta yamando Sra. Zoraida na number 600-1978. El a termina bisando cu e oranan mas trankil ta 4or di atardi ora cu e caba di habri, pues e ora ta un bon orario pa personanan cu poco miedo yega y schaats den un ambiente mas trankil.