Diahuebs atardi, SEPPA a logra mayoria suficiente pa medio di un referendum pa representa sindicalmente e trahadonan di e compania Pro Tech N.V.
E ta un compania cu mas cu 25 aña di existencia. Esaki ta e prome biaha cu e trahadonan di e compania aki ta acerca un sindicato. E compania a prefera laga e referendum solicita pa SEPPA tuma luga, y nan no a bay di acuerdo cu e reconocimento directo di e sindicato pa medio di un proces-verbaal, asina Mediador di Gobierno, Anselmo Pontilius, a informa na Bon Dia Aruba.
Un total di 95 trahado tabatin derecho di voto. E referendum a tuma luga for di 1’or di merdia te cu 4’or di atardi bao absoluto medida di higiena, caminda e mayoria di e trahado a vota tendiendo cuenta cu distanciamento social.
Na final di e referendum e resultado tabata como lo siguiente. Di un total di 95 trahadonan cu derecho di voto, 62 di nan a bay vota di cual 60 a vota pa e sindicato.
Considerando e nivel di e compania, Mediador no tin duda cu conhuntamente cu SEPPA ariba corto plaso, nan lo por yega na acuerdonan specifico. Nan ta den e situacion cu hopi compania ta pasando aden debi na e Covid crisis. Pero segun informacion cu e Mediador a haya for di e compania, nan ta dispuesto pa haci nan maximo esfuerso pa sigui mantene nan personal y sigui brinda nan servicio den nos comunidad.
Di su banda representante di sindicato SEPPA, Gregory Bisslik a laga sa cu e preocupacion ta diferente cerca e trahadonan, pero despues di e resultado di e referendum, nan lo bay atende nan. Mientras cu representante di gerencia di e compania a prefera di abstene di duna informacion aworaki dunando espacio na e negociacion prome.
