(AP) – Un caminda scondi cu ta yega na e mesa di e hogarnan na Merca ta aki, na un luga cu menos a spera, un tereno unda cu catibonan tabata traha cu awo ta e pais su prison di siguridad maximo mas grandi.
Trucknan sin nomber yena di bacanan cria den prison ta sali for di Louisiana State Penitentiary, unda e hombernan ta condena na labor y trabao obligatorio, pa cennan pa ora y tin biaha sin pago. Despues di yega e sitio di subasta, e bacanan ta ser cumpra pa un cunukero local y despues (den e caso aki despues di ser sigui pa The Associated Press) ta caba na matadero cu ta drenta e cadena di suministro di gigantenan manera McDonald’s, Walmart y Cargill. Rednan complica manera esaki ta conecta algun di e companianan mas grandi di cuminda den mundo cu e marcanan mas popular na trabaonan ehecuta pa e prisoneronan Mericano den henter e nacion, segun un investigacion di 2 ana di AP tocante labor den prison relaciona cu miyones di dollar den productonan agricultural bendi den e mercado.
Nan ta entre Merca su trahadornan mas vulnerabel. Si nan nenga traha, algun por pone den peliger nan chens di haya libertad of enfrenta castigo manera ser manda celnan solitario. Tambe nan ta exclui for di proteccionnan garantisa na casi tur otro trahado full-time, hasta ora cu nan ta ser seriamente herida of ta fayece na pia di trabao. E productonan cu e prisoneronan aki ta produci ta caba den cadenanan di suministro di un variedad amplio di producto haya na den mayoria cushina Mericano, for di Frosted Flakes y Ball Park Hotdgos na harina Gold Medal, Coca-Cola y aros di Riceland. Nan ta den casi tur supermercado di e pais, incluyendo Kroger, Targed, Aldi y Whole Foods. Ademas, algun di e productonan aki ta ser exporta tambe, incluyendo na algun paisnan ken su productonan ta prohibi di drenta Merca pa motibo cu nan ta ser produci cu labor den prison obliga.
Varios di e companianan cu ta cumpra directamente for di prison ta den violacion di nan propio politica contra e uso di e tipo di labor aki. Sinembargo e ta completamente legal, grandemente danki na e necesidad id labor pa reconstrui e parti sur su economia despues di e guera civil. Hancra den e Constitucion di e di 13 amienda, sclavitud y servicio no boluntario ta prohibi, cu excepcion di usa esaki como castigo pa un crimen. E clausa aki ta actualmente den discusion riba nivel federal y esfuersonan pa retira lenguahe similar for di constitucionnan estatal ta premira di drenta votacion den decenas di estado e aña aki.
Algun prisonero ta traha na e mesun planta unda e catibonan tabata cultiva catuna, tabaco y cana di sucu mas di 150 aña pasa, cu algun imagen actual sumamente similar na imagennan di pasado. Louisiana, cual tin e pais su tasa mas halto di encarcelacion, hombernan trahando den e linea aki ta traha den rijnan largo cu por mira te den distancia
Willie Ingram a cultiva tur cos desde catuna te na Okra durante su 51 aña den prison conoci como Angola. Durante su tempo trahando, e tabata ser monitoria pa oficialnan arma riba cabay y tabata mira otronan ta traha cu tiki te sin awa y ta cay flauw den calor extremo. Algun dia, e tabata conta, e empleadonan tabata tira nan hermentnan na laira pa manifesta, a pesar di e consecuencianan potencial. “Nan tabata bin, porta 4 den e truck, cu escudo na nan cara y nan tabata dal bo eynan mes na e veld. Nan tabata dal bo, mara bo man, y dal bo atrobe,” Ingram tabata conta, ken a ricibi un sentencia di henter bida den prison despues di a declara su mes culpabel pa un crimen cu e ta bisa e no a comete. El a ser bisa cu e lo mester cumpli 10 aña y evita un posibel sentencia di morto, pero ta te 2021 un Hues cu simpatia a finalmente laga su persona den libertad, e tabatin 73 aña.
Ademas di ta un forsa laboral cheap y confiabel, e companianan tambe ta ricibi credito di impuesto y otro incentivonan financiero. E prisoneronan aki tipicamente no ta cubri pa e proteccionnan mas basico, incluyendo empleadonan su compensacion y standardnan di siguridad federal. Den varios caso, nan no por haci kehonan oficial tocante mal condicionnan di trabao. E prisoneronan aki hopi biaha ta traha den industrianan cu escasez di labor severo, haciendo algun di e pais su trabao mas sushi y mas peligroso.
