Prisioneronan di un prison na Bolivia a venga e crimen di un mucha muhe cu a muri a consecuencia di hopi golpi di banda di su parientenan. Prisoneronan a golpea José Luis Choque den su celda te ora cu el a muri, diamars pasa.
José Luis Choque a muri despues di 4 dia di sufrimento, pa motibo di hopi trauma na su cabes di golpi cu el ricibi den e Penal principal di “La Paz”, asina Hospital di Clinica di Bolivia a informa.
E yiu di Choque tabatin shete aña y a muri siman cu a pasa den otro hospital di Bolivia. E mucha muhe no a logra sali di e estado di coma, den cual el a keda despues di hopi golpi ricibi na man di su parientenan.
E fayecimento di e mucha muhe a lanta rabia den henter poblacion di Bolivia; e situacion aki a obliga autoridadnan pa detene José Luis Choque y Brigida Mamani, cu ta e madrastra di e mucha muhe. Tur dos ta acusa di infanticidio (homicidio di un menor)
Despues di fayecimento di mucha muhe, polis a detene José Luis Choque y un dia o despues cu el a drenta prison, el a haya su morto na man di prisoneronan no identifica ainda. Nan a dune hopi golpi, loke a ocasiona hopi lesion na su curpa, di cual e no a logra recupera.
Autoridadnan di Bolivia a informa cu 34 mucha y adolescente a muri na 2016 pa via di maltrato infantil. Investigacion di Defensor di Pueblo ta kere cu 8 di cada 10 mucha ta sufri algun tipo di maltrato den su famia.
