Na Hulanda ta celebrando Prinsjesdag awe unda e gobierno ta anuncia su maneho y presupuesto pe siguiente aña 2017 y e Rey ta habri e Aña Parlamentario nobo.
Na Aruba esaki a tuma luga siman pasa, semper riba e di dos diamars di september. Na Hulanda esaki ta tuma luga riba e di tres diamars di september
Segun tradicion Rey cu Reina lo core den koets y biaha aki no tabata esun di oro, pero di glas, pa motibo cu e koets di oro ta den restauracion.
Na yegada na Ridderzaal, e Rey Willem-Alexander a tene su discurso (Troonrede).
Poco atencion
E biaha aki casi no a duna atenencion na e desaroyonan na e islanan Hulandes Caribense. Nos partner den noticia, Ret Caribense a publica cu casi nan a ignora nos completamente. E hefe di estado a menciona brevemente e colaboracion di Hulanda cu e islanan Caribense pa e miembrecia temporal di e Veiligheidsraad di Nacionnan Uni. Nada mas.
Terorismo y economia Hulandes
Un tema importante tabata terorismo internacional. Mayoria di e discurso a pone atencion riba e economia Hulandes cu ta recuperando. Casi tur ciudadano Hulandes lo bay dilanti financieramente, segun gobierno Hulandes. Sinembargo segun e fuente NOS cu a inicia un encuesta bou e populacion, mayoria no ta sinti cu e efectonan positivo. Nan hasta a indica cu nan ta sinti cu nan tin menos pa gasta.
Presupuesto Reino
E presupuesto pa e ministerio encarga cu Asuntonan di Reino ta subi di 258 pa 293 miyon euro. E suma pa e islanan di BES ta keda igual.
Tambe importante pa nos ta cu e Kustwacht van het Caribisch Gebied ta haya mas placa (di 37,8 pa 39,6 miyon euro). Esaki lo cubri e buraco den nan presupuesto pa motibo di e diferencia entre e euro y dollar. Esaki tabata un discusion recientemente pasobra e diferencia di valuata aki a conduci na e deficit. Awor gobierno a drecha esaki. Kustwacht tambe ta duna sosten na Aruba vigilando nos awanan teritorial. E itn su tareanan specifico pa entre otro combati contrabanda.
Mester remarca cu e situacion na Venezuela cu ta un preocupacion pa Aruba unda nos gobierno tambe a pidi diferente biaha pa Hulanda duna esaki mas atencion, no ta haya e atencion pidi.
Hulanda si a reserva 70.1 miyon euro pa garantisa husticia, bon gobernacion y derechonan humano na Aruba, Corsou y St. Maarten.
Tin un suma di 150 miyon euro presupuesta pa sanea e debenan di Corsou y St. Maarten pa 2017. Despues di 2019 e suma aki lo baha.
Hulanda Caribense (BES)
Gobierno Hulandes tambe ta bay inverti 14.7 miyon den proyecto social economico na e islanan Boneiro, Saba y St. Eustatius. Un punto importante ta e derechonan di mucha cual a reserva un suma di 3 miyon euro.
E ministerio di Asuntonan Social di Hulanda tambe tin 100 miyon euro pa muchanan den probresa, di cual 1 miyon ta reserva pa muchanan di BES.
