(AP) — E prome potret di Catherine, prinses di Wales, desde su cirugia abdominal casi dos luna atras a keda publica diadomingo hunto cu un declaracion gradiciendo e publico pa nan sosten.
E potret di e prinses sinta riba un stoel rondona pa su tres yiu tabata credita na su esposo, William prins di Wales, heredero na e trono Britanico, y a bisa cu a saca e potret anteriormente den e siman na Windsor.
“Danki pa bo deseonan amable y sosten continuo durante ultimo dos luna,” e prinses a bisa riba rednan social. “Nos ta desea tur hende un feliz Dia di Mama.”
Publicacion di e potret ta yega despues di simannan largo di speculacion riba rednan social tocante e paradero di e prinses di Wales desde cu el a sali di hospital dia 29 di januari despues di un estadia di casi dos siman despues di un cirugia planea. No a mir’e publicamente desde dia di Pasco.
Famia real Britanico ta bao mas scrutinio cu usualmente den ultimo simannan, pasobra tanto Catherine como Rey Charles III no por ehecuta nan debernan publico usual pa motibo di problemanan di salud.
Oficialnan real ta bisa cu e rey ta ricibiendo tratamento pa un forma no specifica di cancer, cual a keda descubri durante tratamento pa un prostaat agranda. E monarca a cancela tur actividad publico mientras e ta ricibi tratamento, maske el a sali riba potret bayendo iglesia y reuniendo di manera priva cu oficialnan di gobierno y dignatarionan.
