(AP) — E ta un di e muhenan mas fotografia na mundo. Pero atencion riba Catherine, Prinses di Wales, no a alcansa e nivel aki desde cu el a casa cu prins di Reino Uni, William, den un boda estilo sprookje na 2011.
Un anuncio di oficialnan di palacio cu Catherine, 42, a ricibi un cirugia abdominal no specifica y lo ta leu di mira publico pa varios siman a duna impulso na speculacion enorme y chisme tocante su salud. Pero un admision di Catherine cu el a altera un potret oficial di su famia – un cu tabatin intencion pa sigura publico cu e ta bon – a empeora cos mas ainda.
E ta un fayo inusual pa e prinses, kende casi no a comete un eror den su trayecto di novia verlegen “comun” di William te bira e mama hoben glamuroso, kende mas cu cualkier miembro di realesa desde Prinses Diana, a reforsa e popularidad y atraccion di e monarkia Britanico rond mundo.
Catherine a disfruta cobertura abrumantemente positivo for di prensa den añanan recien, pero su relacion cu periodistanan no semper tabata asina facil.
Na 2005, abogadonan di Catherine a pidi editornan di corant pa lag’e na paz, bisando cu fotografonan tabata invadiendo su bida priva. Esaki no a stop interes di medionan di comunicacion den su relacion cu William, ni titularnan grocero yamando e “Waity Katie” ora e pareha a separa brevemente na 2007.
Despues di cobertura total di e boda di Catherine y William na april 2011, e pareha a retira den un bida relativamente keto leu di luz publico na Wales rural pa dos aña, mientras William a completa su servicio militar.
Pero e bataya di e pareha real cu prensa atrobe a bin den luz na 2012, ora William y Catherine a demanda un revista Frances pa publica potret di Catherine ‘topless’, saca mientras e pareha tabata di vakantie na un villa priva den sur di Francia.
Presion di medionan di comunicacion riba Catherine a reduci den gran parti ora prins Harry a casa cu Meghan Markle na 2018 y e wowo critico di prensa a bira su scrutinio riba e actriz Mericano. Tabloidenan hopi biaha a pinta Meghan como e novato recien yega den institucion real, un contraste cu e confiable Catherine, mama di futuro rey y faborito di pagina front cu su trahenan elegante y smile fotogenico.
Catherine masha poco a revela su pensamentonan den publico, maske den añanan recien el a crece den confiansa como un orador publico y campeon di educacion trempan den mucha chikito. Na 2021, el a proba cu e tin talento como musico, sorprendiendo e audiencia na un servicio di cantica di Pasco tocando piano.
Bira mama a trece un determinacion pa crea un relacion nobo, mas controla, cu medionan. Na 2015, ora e prome baby di Catherine y William, prins George tabatin apenas 2 aña di edad, e pareha a apela na periodistanan pa stop di saca potret inoficial di e baby prins. Nan a bisa cu nan tabata kier pa nan yiunan tin un bida lo mas “normal” posible.
Desde esey, Catherine y William periodicamente ta publica nan propio potret di nan tres yiu – George, 10; prinses Charlotte, 8; y prins Louis, 5 – pa marca fechanan importante manera cumpleaños y Pasco.
Na 2022, e famia a move for di Palacio di Kensington den centro di Londres na un cottage cerca di Kasteel di Windsor, reforsando nan deseo pa lanta nan yiunan den privacidad relativo.
Esey a bay bon te januari, ora oficialnan di palacio a anuncia cu Catherine tabata hospitalisa pa cirugia abdominal. Nan a bisa cu e no lo aparece den compromisonan publico te cu Pasco di Resureccion.
Su decision pa tene e detayenan priva a impulsa un frenzy den medionan di comunicacion. Publicacion di un potret pa conmemora Dia di Mama na Reino Uni, cual a keda retira diadomingo pa AP y otro agencia noticiero pa preocupacion pa alteracion digital, a genera mas pregunta ainda.
E critica pa e potret, un biaha mas, a laga Reino Uni dividi riba nan opinion riba na con hopi privacidad e famia real tin derecho. Algun ta mira esaki como un golpi pa confiansa den e monarkia.
“Palacio den caos pa critica extraordinario,” The Daily Mirror a proclama ayera. Pero The Sun a agrega: “Baha for di lomba di Kate: Stop bullying pa potret demasiado edita.”
Di tur manera, apetito pa noticia di e prinses ta keda feroz.
