Prinses Christina, ruman chikito di e ex Reina Hulandes Beatrix, a fayece na e edad di 72 aña di cancer di weso. Esaki a keda anuncia diabierna mainta pa e servicio estatal di informacion RVD. E prinses menor di cuater yiu muhe di Reina Juliana, a sufri di cancer di weso durante varios aña. Prinses Christina a fayece na paleis di Noordeinde y lo ser crema den un ceremonia trankilo cu famia, e comunicado a bisa.
Rey Willem-Alexander, Reina Maxima y Prinses Beatrix a bisa riba Twitter cu nan ta aprecia e recuerdonan maraviyoso di nan ‘kerida ruman y tanta’. Su impulso musical y su talento a impacta hopi persona. E prinses a lansa varios CD y a haci presentacionnan publico.
Maria Christina Prinses der Nederlanden, Prinses van Oranje-Nassau, Prinses van Lippe-Biesterfeld a nace na palacio Soestdijk dia 18 di februari 1947. El a casa cu Jorge Guillermo cu kende el a haya tres yiu cune. Su mama Juliana a haya rubella ora cu e tabata na bariga y cu consecuencia Christina a nace casi ciego, aunke e avancenan den medicina y brilnan special a permiti pa su persona biba un bida relativamente normal.
Crisis
Christina su casi ceguera (ciego) a conduci na e introduccion di curandero di Greet Hofmans den e circulo real interno, locual a conduci na un crisis grandi di e decada 1950 debi na e preocupacionnan tocante su influencia pa e Reina.
Christina kende recientemente a biba na London, tabata den noticia na principio di e aña aki, ora cu el a bende un pintura di Peter Paul Rubens na un subasta na New York pa $ 8.2 miyon, incluyendo e costo nan di subasta di $1.2 miyon.
E pintura mas otro obranan di arte a recauda un total di 8 miyon euro pa e prinses. E benta a ser hopi critica na Hulanda pa motibo cu e pintura no a ser ofreci prome na e estado di Hulanda, ni na museonan nacional.
