Cas Real di Hulanda a informa cu su altesa Prinses Beatrix di Hulanda ta bay bishita Aruba y Corsou for di diamars dia 7 te diabierna dia 10 di november. E bishita ta den contexto di e trabao di Dutch Caribbean Nature Alliance (DCNA) y iniciativanan social na e islanan.
Motibo di e bishita ta e congreso di DCNA tocante solucionnan amigable pa cu naturalesa pa restaura ecosistemanan den islanan di Caribe Hulandes. E prinses ta patron di DCNA.
Durante su bishita na Aruba, dia 9 di november mainta, prinses Beatrix ta bay bishita e speeltuin Neptali Henriquez Park. E speeltuin aki tabata den mal condicion y a keda renoba y expandi cu asistencia di Jantje Beton. Prinses Beatrix ta patron di Jantje Beton. E fundacion tin meta pa renoba speeltuinnan na varios sitio den parti Caribense di Reino, sigurando cu nan ta cumpli cu standardnan di seguridad pa asina muchanan por hunga di un manera safe.
Despues di esaki, prinses Beatrix ta bay haci un bishita na e sede di Telefon pa Hubentud. E organisacion ta celebrando su di 25 aniversario proximo aña. E telefon di ayudo pa hubentud di Aruba a bira asina exitoso cu mucha y hoben for di Bonaire, Sint Eustatius y Saba tambe ta yama pa haya un oido.
E prinses ta bay papia cu miembronan di personal y boluntarionan tocante e naturalesa y alcance di problemanan social na Aruba y ta bay siña tocante e diferente actividad y proyecto di e fundacion. Finalmente, e ta bay desvela e logo nobo di Telefon pa Hubentud.
Subsecuentemente, Gobernador di Aruba, Su Excelencia Alfonso Boekhoudt ta bay ta anfitrion di un lunch pa e prinses na e Cas Ceremonial.
Den parti atardi, prinses Beatrix ta bay bishita Spaans Lagoen, un area di wetland y naturalesa cu boskenan di mangel. Aki, empleadonan di Fundacion Nacional Parke Arikok (FPNA) ta bay presenta e proyecto ‘Turning the Tide’, un proyecto piloto di adaptacion pa clima y restauracion di naturalesa. Ta ehecutando e proyecto den colaboracion cu Universidad di Aruba, Fundacion ScubbleBubbles y Wageningen University & Reseatch, y ta posible danki na fondonan di programa di UE, RESEMBID.
Den e boskenan di mangel, ta borando canalnan pa captura sedimento, cu meta pa restaura calidad di awa y e funcion di ‘nursery’ di e mangelnan y pa protege e rifnan di coral cercano. Adicionalmente tin esfuersonan andando pa restaura rifnan di coral door di instala dos tipo di rif artificial.
Durante un caminata cortico, ta bay duna e prinses un splicacion di e importancia di e boskenan di mangel y rifnan di coral pa restauracion di naturalesa y biodiversidad.
Riba diabierna dia 10 di november mainta, prinses Beatrix ta bay bishita Parke Nacional Arikok. FPNA a inicia un proyecto akinan pa reintroduci un especie di parha cu a bira extinto na e isla back den naturalesa. E parha aki tin un distribucion limita, haciendo su reintroduccion na Aruba specialmente significante.
E prinses ta bay presencia un presentacion riba e programa aki di preservacion di biodiversidad y ta bay observa e parhanan na e sitio. Tambe e ta bay discuti e importancia di e proyecto aki cu esnan involucra.
Atardi, e prinses ta bay atende e ciere di e congreso DCNA na Universidad di Aruba. E evento aki tin meta pa facilita e intercambio di conocemento y experiencia pa asina por haci esfuersonan colaborativo pa haya solucionnan natural pa preserva y restaura ecosistemanan den region Caribe. E seis parke participando ta bay presenta nan puntonan di enfoke, solucion y partnership pa mehora maneho di naturalesa riba e islanan di Caribe Hulandes.
DCNA ta componi pa e organisacionnan FPNA, Carmabi, Nature Foundation Sint Maarten, Saba Conservation Foundation (SCF), Sint Eustatius Natural Parks Foundation (Stenapa), y Stichting Nationale Parken Bonaire (Stinapa Bonaire). E organisacionnan di naturalesa aki riba e seis isla di e parti Caribense di Reino Hulandes a bin hunto pa mehora maneho di naturalesa, fundraising sostenible, educacion tocante naturalesa y intercambio di conocemento.
Potret: Beeld: ©RVD – Gemmy Woud-Binnendijk
