Prinses Beatrix lo ta na Aruba entrante 30 di maart te cu dia prome di april. Esaki riba invitacion di Parke Nacional Arikok relaciona cu un bishita di trabao.
Parke Nacional Arikok ta forma parti di e Dutch Caribbean Nature Alliance (DCNA), di cual Prinses Beatrix ta su protector. Durante di su bishita e lo bishita Spaans Lagoen, Bubali Plas y Universidad di Aruba. Diabierna 31 di maart Prinses Beatrix lo ta presente na e ocasion di traspaso oficial di e area di Spaans Lagoen pa Parke Nacional Arikok.
Por medio di e traspaso aki e e terenonan di Spaans Lagoen na un manera oficial lo bay forma parti di Parke Nacional Arikok cual lo haci cu e area aki lo ricibi e proteccion necesario. Spaans Lagoen tin un biodiversidad hopi halto y internacionalmente e ta area tin gran importancia pa motibo si su variacion di flora y fauna. Diahuebs 30 di maart su Mahestad Prinses Beatrix lo ta presente na Universidad di Aruba pa presencia un debate di hobennan organisa pa Parlamento Hubenil. Lo tin dos tema: economia versus naturalesa y turismo versus identidad.
Riba diabierna 31 di maart su Mahestad Prinses Beatrix lo bishita Bubali plas, un zona cu hopi awa di gran importancia pa parhanan y biodiversidad. Tambe Prinses Beatrix lo presencia un seminario den Parke Nacional Arikok. E bishita lo conclui cu un lunch ofreci pa su gobernador Alfonso Boekhoudt.
