(CuraçaoChronicle) – Prinses Amalia tin speransa cu e situacion pa cu e menasanan den su contra na Hulanda lo cambia pronto. E yiu mas grandi di Rey Willem-Alexander y Reina Maxima a expresa esaki riba su ultimo dia como parti di e biahe di introduccion na e parti Caribe di Hulanda.
El a agrega cu actualmente e ta pasando door di momentonan cu ta dificil, pero tambe cu e tin confiansa cu e situacion no lo dura. “Mi a cuminsa mi dianan y bida como studiante cu e idea di haci loke studiantenan ta haci. E realidad tabata hopi leu di esaki. Mi ta bay ta honesto, te ainda e ta un situacion hopi dificil pa mi,” Amalia a expresa. El a bisa cu el a stima hopi cu e por a sinti un poco di su libertad back durante e biahe aki cu su mayornan. El a bisa cu el a pasa un momento grandioso.
“Mi kier expresa mi gratitud di ambos familiarnan y amistadnan pero tambe di tur parti di Hulanda, incluyendo e parti Caribense,” E Prinses a comenta. E ta “straña e bida di studiante” hopi, pero tambe a bisa cu e ta straña por djis drenta un tienda. E no a duna comentario si studia fuera di e pais ta un opcion cu e ta considerando mirando cu te ainda e ta un studiante di University of amsterdam.
Rey Willem-Alexander a bisa cu e no a preocupa tocante su yiu su siguridad durante e bishita na e islanan. “Mi mes no ta un experto den siguridad. Kiermen si mi bay preocupa pa esaki, mi lo ta preocupando pa algo den cual mi no tin experiencia. Mi a laga esaki na e personanan cu por bisa ‘bo por cana safe aki,” e Rey a bisa. “Na e momento ey, mi no ta pense mes.”
Aña pasa e Rey y Reina a anuncia cu Amalia no por a biba na Amsterdam mas pa causa di e menasanan. E heredera di e trono tabata den medio di muda pa e capital pa su estudionan sinembargo mester a keda cas. E gobierno su servicio di informacion RVD y Ministerio Publico no a haci ningun declaracion pa cu e prinses su siguridad.
