(AP) – Prinsnan William y Harry a pone na un banda nan diferencianan y conflicto, pa bini hunto y revela e estatua di Prinses Diana, fortaleciendo nan difunto mama su luga den historia real riba e dia cu ta marca e prinses su 60 aña di nacemento.
Diana su 3 rumannan a compaña e prinsnan pa e ceremonia priva na Sunken Garden den Kensington Palace na London, un luga unda cu e prinses tabata encontra antes. E ta e di dos biaha cu e dos prinsnan ta ser mira hunto den publico desde cu Harry a retira di su responsabilidadnan real casi un aña pasa.
E estatua, cual ta Prinses Diana cu 3 mucha ta rondona su persona, tabata un comision di e prins nan den aña 2017. E estilo di su shimis ta haci honor na e ultimo periodo di e prinses su bida, unda cu el a sinti sigur di su mes den su trabao humanitario.
E estatua ta “inmensamente importante” pa motibo cu e ta resalta e prinsnan su esfuerso pa ilustra Diana como un persona cu a conecta cu e pueblo y cu a modernisa e monarkia, Robert Lacy, autor di “Battle of Brothers: William, Harry and the Inside Story of a Family in Tumult” a comenta. Tradicionalistanan a critica e prinses, bisando cu e tabata faltando respet na e tradicionnan cu ya tin siglo den vigor.
