Prins Harry y Meghan Markle lo perde tur nan patronahenan real

Prins di Inglatera, Harry y su esposa Meghan Markle a dicidi di duna nan amiga Oprah Winfrey un entrevista despues di haya sa cu nan ta bay perde tur e resto di nan lasonan real na momento cu e terminonan di nan pakete di salida di famia real wordo revisa dia 31 di maart proximo, a revela ayera.

The Daily Mail ta bisa cu personanan cu conocemento di e situacion na Buckingham Palace ta kere cu e entrevista, cu lo transmiti riba CBS dia 7 di maart, a ser organisa pa Meghan (39 aña) y Harry (36 aña) pasobra e pareha por a mira e direccion cu cos ta bayendo relaciona cu nan rolnan real.

E corant, cu siman pasa a perde un demanda di privacidad di Meghan, a bisa cu e pareha awo ta casi sigur cu Reina Britanico lo corta nan ultimo lasonan cu cualkier organisacion cu a pasa na nan mediante famia real.

Harry lo mester entrega e tres titulo militar honorario restante como tambe su rol clave encabesando sosten real pa e London Marathon. Lo pidi Meghan pa retira como patron di Teatro Nacional, pero e corant ta sugeri cu e por logra negocia otro posicion cu nan.

Interesante ta cu e palacio ta parce di tin motivacion pa no actua den forma di represalia of vengansa contra Meghan, cu ta na estado, y Harry, informando cu e movida pa retira e titulonan real di e pareha no ta un reaccion na e entrevista. E sugerencia ta cu Harry y Meghan simplemente por a ‘sense’ ki caminda cos ta bayendo.

The Daily Beast a compronde cu Buckingham Palace no a ser informa di e entrevista di antemano, pero oficialnan di palacio a busca di elimina cualkier sentido di malestar dialuna nochi, cu fuentenan bisando cu ya cu e pareha no ta traha cu famia real mas, cualkier decision cu nan ta tuma cu relacion na compromisonan den media ta asunto di nan, y cu nan no tin obligacion di informa e palacio di nan planes.

Mientras cu probablemente no lo tin e mesun impacto teribel riba famia real cu entrevista di prins Andrew cu Newsnight na 2019 of esun di prinses Diana cu Panorama na 1995, probablemente tin cierto miedo di kico Meghan por revela den e entrevista. Ta kere cu palacio ta particularmente nervioso tocante posibel acusacion di racismo of sexismo, The Times ta reporta.

Sinembargo, e hecho cu Meghan y Harry ta sinta cu Winfrey no ta algo inespera. Winfrey tabata presente na e boda di e pareha na 2018, despues di a conoce Meghan un biaha so den pasado, y desde e tempo ey a busca amistad cu e apreha.

Na 2019 a anuncia cu e tabata trahando hunto cu Harry riba un documental tocante salud mental y tambe a mira Winfrey bishitando mama di Meghan, Doria, na su cas na Los Angeles. Nan ta biba cerca di otro na Montecito, y Winfrey a usa su rednan social pa promove un marca di coffee den cual Meghan a inverti.

Un fuente a bisa e Mail cu e entrevista proximo cu Winfrey tabata ‘un di e consecuencianan mas inevitable y tristemente predecibel’ di e salida di e pareha for di famia real.