(AP) – Prins Harry a perde e ronda preliminar riba diabierna den e caso di difamacion contra e publicador di Daily Mail a causa di un articulo unda a acusa cu el a purba sconde su esfuersonan pa mantene proteccion publicamente paga na Reino Uni despues di a retira for di su rol como un miembro activo di e famia real.
Hues di Corte Halto na London a declara cu Associated Newspapers Ltd. por sigui argumenta cu e storia ta refleha un “opinion honesto” tocante e hechonan di e caso y pa e motibo aki no ta un difamacion. E publicador, cual den e caso aki ta e acusado, tin un “chens real” di por demostra cu e declaracionnan publico haci pa Harry no tabata e informacion corecto segun e hues a skirbi den su decision. “Mi ta anticipa cu na e huicio, e acusadolo por entrega cu esaki tabata un les den e arte di ‘spinning,’ Husticiero Matthew Nicloin a skirbi. “Y, e acusado ta argumenta, e tabata exitoso den duna mal informacion y/of confudi e publico.”
Un audiencia ta den plan pa diamars pa asina por trata e consecuencianan di e decision aki.
E declaracion aki ta bini un dia despues cu otro hues a conclui 3 dia di argumento, mayoria tras portanan cera, tocante si e gobierno inhustamente a kita e siguridad di Harry despues cu su persona y su famia a muda bay Merca den aña 2020.
