(AP) — Prins Harry a entrega un peticion pa un revision hudicial contra e decision di gobierno Britanico pa no permitie paga personalmente pa proteccion di polis mientras e ta den Reino Uni.
Representante legal di e Duke di Sussex a bisa diasabra cu Harry kier trece su yiunan Archie y Lilibet pa bishita su pais natal for di Merca, pero ta mucho riesgoso sin proteccion di polis. E representante a bisa cu Harry kier paga pa e proteccion di polis su mes. Su team di seguridad personal na Merca no tin hurisdiccion adecua den exterior di acceso na informacion di inteligencia Britanico, nan a bisa.
A entrega e solicitud pa revision hudicial na september, pa reta e toma di decision di gobierno Britanico tras di e proceduranan di seguridad. Harry y su esposa Meghan a perde proteccion di polis paga publicamente na Reino Uni, na momento cu nan a retira como miembronan senior trahando pa famia real y a muda na Merca na 2020.
E declaracion ta bisa cu Harry a ofrece pa personalmente paga pa proteccion di polis Britanico pa su mes y su famia na januari 2020 durante negociacionnan cu e Reina tocante futuro di e duke. E oferta a keda ‘rechasa’, segun e declaracion.
Gobierno Britanico a bisa cu su sistema di seguridad ta ‘riguroso y proporcional’ y a nenga di comenta riba e detayenan.
