Prins Harry ta demandando The Sun y the Daily Mirror, dos di e tabloidenan mas popular di Reino Uni, tocante supuesto hacking di celular.

Buckingham Palace a confirma diasabra cu rumornan tocante ‘intercepcion ilegal di mensahenan di bos’ a ser entrega den nomber di Harry. E palacio a nenga di bisa mas of duna detaye, ‘mirando cu e particularnan di e acusacionnan ainda no ta publico’.

News Group Newspapers, doño di The Sun y e awo- defunto News of the World, a reconoce e accion legal di e prins, mientras cu Reach, doño di e Mirror, a bisa cu ta ‘na altura cu a cuminsa procedura’ pero no a ser notifica di esaki.

E casonan ta incendia e pelea di Harry cu tabloidenan Britanico. E ta yega algun dia despues cu su esposa Mericano, Meghan, dukesa di Sussex, a demanda e Mail on Sunday pa supuesto violacion di derecho di autor, maluzo di informacion priva, y viola e ley di proteccion di data Britanico, despues cu a publica un carta cual el a skirbi pa su tata.

Harry a condena tabloidenan Britanico despues cu Meghan a entrega su demanda diamars, bisando den un declaracion cu e demanda di su casa, cual a dura luna pa traha, tabata un contesta na un ‘campaña sin piedad’ pa mancha su caracter door di crea ‘mentira tras mentira’ durante su verlof di maternidad.

E prins a acusa medionan Britanico di acosa Meghan mesun forma cu a haci cu su mama, Prinses Diana, kende a fayece den un accidente di auto na 1997 mientras e tabata purba di evadi paparazzi.

Tabloidenan Britanico a paga miyones di dollar pa conclui demandanan cu nan epleadonan a hack e mensahenan di bos den celular di celebridadnan, politiconan y otronan den mira publico.

E demandanan di e prins probablemente ta bay bek algun aña. News of the World a cera na 2011, durante e scandal di hacking y ora su anterior editornan a bay huicio, un corte a scucha evidencia cu a indica cu Harry, hunto cu su ruman homber Prins William, tabata victima di e intercepcion ilicito di mensahe di telefon na man di e tabloide.

E transcripcion di un di e mensahenan cu a lesa durante e huicio tabata un grabacion na 2006 di William, pretendiendo di ta e pareha di Harry e tempo ey, revelando e grado di intrusion di medionan den nan bida priva.

Harry y William pa largo tin un relacion dificil cu prensa. Nan a lanta den spotlight y tabata muchanan homber jong ora e divorcio dificil di nan mayornan a ser cubri ampliamente.