(AP) – Prins Harry su memoir, un obheto di anticipacion mundial desde cu el a ser anuncia aña pasa lo ser publica dia 10 di januari proximo aña.
E buki lo ser titula “Spare” y lo ser distribui pa Penguin Random House como un storia conta cu “honestidad completo” y yena di “revelacion, examinacion propio y sabiduria tocante e poder eterno di amor mas cu luto.”
Den un declaracion publica diahuebs, Penguin Random House a trece dilanti memorianan di e fayecimento di prins Harry su mama Prinses Diana na aña 1997, y e imagen di Harry y su rumanhomber ta cana “tras di su mama su caha di morto mientras henter mundo ta mira den dolor y horor.”
“Mientras Diana, prinses di Wales, a ser hiba su luga di descanso, miyones a pensa kico e prinsnan mester ta pensando y sintiendo na e momentonan aki, y con nan bida lo sigui desaroya desde e punto aki,’ parti di e declaracionnan a bisa.
“Pa Harry, a yega e momento di finalmente conta su storia.”
E titulo di e memoir aki ta un referencia na e frase “the heir and the spare (e heredero y e spare),” un frase hopi usa pa describi rumannan real. Harry su ruman homber, William, awo ta prins di Wales y e heredero di e trono Britanico.
Ora cu Harry a nace, e tabata net tras di Harry den e linea pa hereda esaki, sinembargo desde e tempo aki el a ser pusha mas abao den e lista. Nan tata, Rey Charles III, a subi trono recientemente despues di fayecimento di Reina Elizabeth II luna pasa.
Fanaticonan real y e publico a specula sin fin desde cu e buki a ser anuncia den juli 2021. Dentro di oranan despues di su anuncio, “Spare” tabata entre e top 10 di Amazon su bukinan mas bendi.
